پاک بھارت کشیدگی: بہاونگر کے علاقے فورٹ عباس پر بھارتی گولہ باری، کوئی جانی نقصان نہیں ہوا

بہاولنگر (ڈیلی اردو) بھارت کی سرحد سے 15 کلو میٹر دور پنجاب کے ضلع بہاول پور کے علاقے فورٹ عباس میں گولے گرنے کی اطلاعات ہیں اور نجی ٹی وی چینل کا کہنا ہے کہ یہ گولے چولستان کے صحرا میں گرے جس میں کسی بھی قسم کا جانی نقصان نہیں ہوا۔

تاہم یہ گولے حال ہی میں گرنے کی سرکاری طور پر پاکستان کی طرف سے تصدیق نہیں ہوسکی۔

فورٹ عباس کے صحرا میں خول ملنے کے بعد میڈیا میں متضاد خبریں گردش کررہی ہیں اور سوشل میڈیا صارفین نے بھی ہنگامہ برپا کر رکھا ہے اور ایسی غیر مصدقہ اطلاعات بھی ہیں کہ ایل او سی کے اس پار موجود بھارتی فورسز نے شیل فائر کیے۔

کچھ صارفین صورتحال واضح کر رہے ہیں اور ایک صارف نے لکھا کہ ” فورٹ عباس میں ایسا کچھ نہیں ہوا، یہ خول چک نمبر 248 سے ملے جو کہ سرحد سے 6 کلومیٹر کی دوری پر ہے۔

جبکہ مقامی ذرائع کا کہنا ہے کہ گولے چک نمبر 246 اور چک نمبر 248 کے علاقے شاہیواں والا ٹوبہ کے قریب گرے ہیں۔

یاد رہے کہ فورٹ عباس ضلع بہاولنگر کی تحصیل ہے اور پاک بھارت بارڈر کے قریب جنوبی پنجاب میں واقع ہے۔