پاک بھارت کشیدگی، دونوں ممالک نے ایک دوسرے کے اہلکار کو ملک چھوڑنے کا حکم دے دیا

اسلام آباد + نئی دہلی (ڈیلی اردو) پاکستان اور بھارت کے درمیان سفارتی کشیدگی میں اضافہ دیکھنے میں آیا ہے کیونکہ دونوں ممالک نے ایک دوسرے کے سفارتی اہلکاروں کو ‘پرسونا نان گریٹا’ (ناپسندیدہ شخصیت) قرار دیتے ہوئے 24 گھنٹوں کے اندر ملک چھوڑنے کا حکم دیا ہے۔

پاکستانی دفتر خارجہ کی جانب سے جاری بیان کے مطابق اسلام آباد میں تعینات بھارتی ہائی کمیشن کے ایک اہلکار کو ایسی سرگرمیوں میں ملوث پایا گیا جو ان کی سفارتی حیثیت کے منافی تھیں۔ بیان میں کہا گیا ہے کہ انڈین ناظم الامور کو وزارت خارجہ طلب کر کے اس فیصلے سے باضابطہ طور پر آگاہ کیا گیا اور اُنہیں ڈیمارش بھی کیا گیا۔

اس فیصلے سے چند گھنٹے قبل بھارت کی جانب سے بھی ایسا ہی اقدام سامنے آیا تھا جس کے تحت نئی دہلی میں پاکستانی ہائی کمیشن کے ایک اہلکار کو ناپسندیدہ قرار دے کر ملک چھوڑنے کا حکم دیا گیا۔ بھارتی وزارت خارجہ نے پاکستانی ناظم الامور کو طلب کر کے ڈیمارش کیا اور متعلقہ اہلکار پر مبینہ طور پر “غیر موزوں سرگرمیوں” میں ملوث ہونے کا الزام عائد کیا۔

یہ سفارتی اقدامات ایسے وقت میں سامنے آئے ہیں جب حالیہ دنوں میں لائن آف کنٹرول پر کشیدگی میں اضافہ دیکھا گیا تھا۔