پاکستان زندہ باد: نعرے لگانے والا بھارتی ہندو شہری گرفتار، غداری کا مقدمہ درج

نئی دہلی (دہلی اردو) یہ واقعہ بھارتی ریاست کرناٹک کے شہر کُندا پور میں پیش آیا۔ ‘’پاکستان زندہ باد’’ کے نعرے لگانے والے اس انڈین شہری کی شناخت راگھویندر کے نام سے ہوئی ہے۔

تفصیلات کے مطابق بھارت میں ایک بار پھر پاکستان کی حمایت میں نعروں کی گونج سنائی دی ہے۔ حالیہ واقعہ ریاست کرناٹک کے شہر کندا پور میں پیش آیا جہاں ایک انڈین شہری نے پولیس کے سامنے ’پاکستان زندہ باد’’ کے نعرے لگا دیئے۔

واضح رہے کہ ریاست کرناٹک میں پاکستان کی حمایت میں نعرے لگانے کا یہ تیسرا واقعہ ہے۔ حالیہ واقعے میں راگھویندر نامی 42 سالہ شہری نے سرکاری دفتر میں داخل ہو کر وہاں پولیس کی موجودگی میں پاکستان کے حق میں نعرے بلند کرنا شروع کر دیے۔

وہاں موجود لوگوں نے اس شخص کی موبائل کے ذریعے ویڈیو بنا کر سوشل میڈیا پر شیئر کر دی جو دیکھتے ہی دیکھتے وائرل ہو گئی۔ راگھویندر کو جب پولیس نے حراست میں لیا، تب بھی وہ بار بار ‘’پاکستان زندہ باد’’ کے نعرے لگاتا رہا۔

مقامی لوگوں اور کُنداپور کے تحصیلدار کی جانب سے اس شخص کے خلاف پولیس میں تحریری شکایت درج کروانے کے بعد پولیس نے راگھویندر کے خلاف ملک سے غداری کا مقدمہ درج کر لیا ہے۔

انڈین میڈیا کے مطابق دوسری جانب یہ بات بھی سامنے آئی ہے کہ ‘’پاکستان زندہ باد’’ کے نعرے لگانے والا یہ شخص 8 سال قبل ٹیچر کے طور پر خدمات انجام دے رہا تھا لیکن ذہنی پریشانی میں مبتلا ہونے کی وجہ سے اسے سکول سے برطرف کر دیا گیا۔ راگھویندر گانیگ نامی اس شخص کا تعلق کُنداپور کے کوڈی مقام سے ہے۔

پولیس حکام کا کہنا ہے کہ ہم اس شخص کی دماغی حالت کے سلسلے میں کچھ نہیں کہہ سکتے۔ میڈیکل رپورٹ آنے کے بعد مزید معلومات فراہم کرینگے۔

کنداپور پولیس سٹیشن میں راگھویندر کے خلاف ایف آئی آر درج کی گئی ہے اور اس کیخلاف ملک سے غداری کا مقدمہ درج ہوا ہے۔

واضح رہے کہ کرناٹک میں حالیہ دنوں میں پاکستان کی حمایت میں نعرے لگانے کا یہ تیسرا واقعہ ہے۔