پاکستان نے افغان دفترخارجہ کے پشاور مارکیٹ سے متعلق بیان کو مسترد کردیا

اسلام آباد (ڈیلی اردو) پاکستان نے افغان دفترخارجہ کے پشاور مارکیٹ سے متعلق بیان کو مسترد کردیا ہے۔

ترجمان دفتر خارجہ ڈاکٹر فیصل کہتے ہیں کہ افغان دفترخارجہ کے پشاور مارکیٹ سے متعلق بیان کو مسترد کرتے ہیں ۔ افغان دفتر خارجہ کی جانب سے وقوعے کو گمراہ کن انداز میں پیش کرنا قابل افسوس ہے۔

ترجمان کے مطابق معاملہ ایک شہری اور ایک بینک کے درمیان تھا۔ سنہ 1998 میں معاملے سے متعلق شہری کے حق میں فیصلہ ہوا جس پر افغان فریقین کی جانب سے برعکس اقدامات پر لوکل انتظامیہ نے ایکشن لیا، تاہم اس حوالے سے عدالتی نظام سے متعلق بیانات مسترد کرتے ہیں۔

ترجمان نے مزید بتایا کہ ا فغان حکومت کی جانب سے احتجاجاً کونسلیٹ جنرل کی بندش قابل افسوس ہے، امید کرتے ہیں کہ افغان حکومت اس فیصلے پر نظر ثانی کرے گی۔ امید ہے کہ نجی کیس کے باعث دو برادر ممالک کے تعلقات خراب نہیں ہونگے۔