پشاور میں فائرنگ کے دو واقعات میں دو پولیس اہلکار ہلاک، ایک زخمی

اسلام آباد (ش ح ط) صوبہ خیبر پختونخوا کے صوبائی دارالحکومت پشاور میں نامعلوم افراد کی فائرنگ سے دو پولیس اہلکار ہلاک اور ایک زخمی ہو گیا ہے۔

پولیس کے مطابق تھانہ پھندو کی حدود میں رات گئے ابابیل فورس نے مشکوک موٹرسائیکل سواروں کو رکنے کا اشارہ کیا، اہلکاروں نے نہ رکنے پر گرفتاری کیلئے ملزمان کا تعاقب کیا، جس پر ملزمان نے اندھا دھند فائرنگ کردی، فائرنگ کے نتیجے میں پولیس اہلکار قیصر خان موقع پر ہی ہلاک جبکہ دوسرا اہلکار رحم نیاز زخمی ہوگیا۔

دونوں پولیس اہلکار تھانہ گلبہار میں تعینات تھے، زخمی اہلکار کو ہسپتال منتقل کردیا گیا۔

پولیس نے ڈیلی اردو کو بتایا کہ مسلح افراد کی فائرنگ سے ایک اہلکار موقع پر ہی ہلاک جبکہ ایک زخمی ہوگیا۔

دوسری جانب ایک اور پولیس اہلکار کی ہلاکت کا واقعہ پشاور کے نواحی علاقے بڈھ بیر میں پیش آیا۔

پولیس کے مطابق منگل کی شب بڈھ بیر میں ٹیلہ بند روڈ پر سرچ آپریشن کے دوران مسلح افراد نے ایڈیشنل ایس ایچ او سمیت دیگر پولیس پارٹی پر فائرنگ کی۔

#Pakistan: A cop was gunned down by unknown individuals in the Badhaber area of Peshawar, KPK province. https://t.co/TND4nW3T97

— ???? (@cozyduke_apt29) February 27, 2024

مسلح افراد کی فائرنگ پر پولیس اہلکاروں نے جوابی کارروائی بھی کی، جس پر دونوں جانب سے فائرنگ کا تبادلہ ہوا۔

پولیس کے مطابق دہشت گردوں کی فائرنگ سے توصیف نامی پولیس اہلکار ہلاک ہوگیا۔

واقعے کے بعد پولیس کی بھاری نفری جائے وقوعہ پر پہنچی اور شواہد اکھٹے کرکے دہشت گردوں کی گرفتاری کیلئے علاقے میں سرچ آپریشن شروع کردیا۔

ادھر ضلع ڈیرہ اسماعیل خان کے علاقے کوہی میں پولیس گاڑی کے قریب دھماکہ ہوا ہے تاہم کوئی جانی نقصان نہیں ہواہے۔

تاحال کسی بھی گروہ نے ان حملوں کی ذمہ داری قبول نہیں کی ہے۔