پشاور: ٹارگٹ کلنگ میں ملوث حملہ آور کی مبینہ سی ٹی ڈی کارروائی میں ہلاکت

پشاور (ڈیلی اردو) پاکستان کے شورش زدہ صوبے خیبرپختونخوا کے صوبائی دارالحکومت پشاور میں کاؤنٹر ٹیررازم ڈپارٹمنٹ (سی ٹی ڈی) نے کارروائی کے دوران ایک ٹارگٹ کلر کو ہلاک کر دیا۔ سی ٹی ڈی حکام کے مطابق یہ کارروائی ملزم کی نشاندہی اور شناخت کے لیے کی جا رہی تھی۔

صوبہ خیبرپختونخوا میں دہشتگردی اور ٹارگٹ کلنگ کے خاتمے کے لیے محکمہ انسداد دہشتگری (سی ٹی ڈی) کی کارروائیاں جاری ہیں۔ اسی سلسلے میں پشاور میں ایک کارروائی کے دوران بدنام زمانہ ٹارگٹ کلر محمد ثنان عرف حبیب ولد عبد الرحمن کو ہلاک کیا گیا۔

سی ٹی ڈی حکام کے مطابق ملزم کو پراسیکیوشن برانچ سے قانونی پراسیس کے تحت تفتیش کے لیے لایا گیا تھا، جہاں دوران انٹروگیشن اس نے متعدد دہشتگردی کے مقدمات میں براہِ راست یا بالواسطہ ملوث ہونے کا اعتراف کیا۔ سی ٹی ڈی کے مطابق ملزم نے دوران انٹروگیشن اے ایس آئی فصیح اللہ اور ٹکٹنگ آفیسر سلمان کو ٹارگٹ کلنگ کے ذریعے ہلاک کرنے کا بھی اعتراف کیا۔

کارروائی کے دوران ٹارگٹ کلر ہلاک

محکمہ انسداد دہشتگری کی ٹیمیں اور تفتیشی اسٹاف مجرم کو مقامات وقوعہ کی نشاندہی کے لیے لے جا رہے تھے کہ حسن خیل زاخیل کے مقام پر پولیس پارٹی پر سنائپر فائرنگ کی گئی۔ اس فائرنگ کے نتیجے میں بدنام زمانہ ٹارگٹ کلر ثنان عرف حبیب ہلاک ہو گیا، جبکہ پولیس پارٹی محفوظ رہی۔ پولیس وین کو بھی نقصان پہنچا۔

سی ٹی ڈی نے واقعے کی مزید تفتیش شروع کر دی ہے اور ممکنہ نیٹ ورک کے دیگر ملزمان کی تلاش جاری ہے۔