پنجاب: میانوالی میں سی ٹی ڈی آپریشن میں 6 مبینہ عسکریت پسند ہلاک

لاہور (ڈیلی اردو) پاکستان کے صوبہ پنجاب کے ضلع میانوالی میں کاؤنٹر ٹیررازم ڈیپارٹمنٹ (سی ٹی ڈی) نے دعویٰ کیا ہے کہ کارروائی کے دوران چھ مبینہ عسکریت پسند اپنے ہی ساتھیوں کی فائرنگ سے ہلاک ہو گئے، جبکہ آٹھ دیگر فرار ہونے میں کامیاب ہو گئے۔

سی ٹی ڈی کے ترجمان کے مطابق یہ کارروائی انٹیلی جنس معلومات کی بنیاد پر کی گئی۔ چاپڑی ڈیم کے قریب شدت پسندوں نے سی ٹی ڈی ٹیم پر فائرنگ کی، جس کے نتیجے میں فائرنگ کے تبادلے میں چھ مبینہ عسکریت پسند اپنے ہی ساتھیوں کی فائرنگ سے ہلاک ہو گئے۔

ترجمان نے بتایا کہ ہلاک ہونے والوں کے قبضے سے ایک خودکش جیکٹ، تین دستی بم، چھ ایس ایم جی رائفلز، 200 گولیاں اور دیگر بارودی مواد برآمد ہوا۔

ڈیلی اردو کو ذرائع نے بتایا ہے کہ ہلاک ہونے والے مبینہ عسکریت پسندوں کا تعلق کالعدم تحریک طالبان پاکستان سے تھا۔

سی ٹی ڈی نے اعلان کیا ہے کہ فرار ہونے والے عسکریت پسندوں کی گرفتاری کے لیے تلاش اور سرچ آپریشن جاری ہے۔