پنجاب میں ایک ماہ کے دوران 49 دہشت گرد گرفتار، سی ٹی ڈی کا دعویٰ

لاہور (نمائندہ ڈیلی اردو) پاکستان کے صوبہ پنجاب میں دہشت گردی کے ممکنہ خدشات کے پیش نظر کاؤنٹر ٹیررازم ڈیپارٹمنٹ (سی ٹی ڈی) پنجاب نے صوبے کے مختلف شہروں میں ایک ماہ کے دوران بڑے پیمانے پر انٹیلیجنس بیسڈ آپریشنز (IBOs) کیے، جن کے نتیجے میں 49 دہشت گرد گرفتار کر لیے گئے۔

سی ٹی ڈی کے ترجمان کے مطابق گزشتہ ایک ماہ کے دوران 425 انٹیلیجنس بیسڈ آپریشنز کیے گئے، جو لاہور، راولپنڈی، جہلم، ٹوبہ ٹیک سنگھ، حافظ آباد، چکوال، گجرانوالہ، ڈیرہ غازی خان، فیصل آباد، ساہیوال، چنیوٹ، پاکپتن، خوشاب، نارووال، سیالکوٹ، اٹک اور وہاڑی سمیت صوبے کے مختلف اضلاع میں انجام دیے گئے۔

ترجمان نے بتایا کہ لاہور سے بھارتی خفیہ ایجنسی را سے وابستہ ایک مبینہ ایجنٹ مجتبیٰ کو بھی گرفتار کیا گیا، جس کے قبضے سے دھماکہ خیز مواد، اسلحہ اور حساس و اہم عمارتوں کے نقشے برآمد ہوئے۔

سی ٹی ڈی کے مطابق گرفتار دہشت گردوں کے قبضے سے ہینڈ گرنیڈز، آئی ای ڈی بم، ڈیٹونیٹرز، حفاظتی فیوز وائر، پمفلٹس، نقدی اور دیگر حساس سامان بھی برآمد کیا گیا۔ حکام کا کہنا ہے کہ یہ عناصر مختلف مقامات پر دہشت گردانہ کارروائیاں کر کے عوام میں خوف و ہراس پھیلانے کی منصوبہ بندی کر رہے تھے۔

ترجمان سی ٹی ڈی نے مزید بتایا کہ ایک ماہ کے دوران 6 ہزار 131 کومبنگ آپریشنز بھی کیے گئے، جن میں 599 مشتبہ افراد کو حراست میں لیا گیا، جبکہ 2 لاکھ 43 ہزار سے زائد افراد سے پوچھ گچھ کی گئی۔

سی ٹی ڈی پنجاب کا کہنا ہے کہ محفوظ پنجاب کے ہدف پر عملدرآمد جاری ہے اور دہشت گردی کے ناسور کو جڑ سے اکھاڑ پھینکنے کے لیے ادارہ مکمل طور پر پرعزم ہے۔