ڈیرہ اسماعیل خان خودکش دھماکا: افغان مہاجر کیمپ میں پرورش پانے والے حملہ آور کی شناخت

ڈی آئی خان (نماائندہ ڈیلی اردو ) پاکستان کے شورش زدہ صوبے خیبر پختونخوا کے ضلع ڈیرہ اسماعیل خان میں شادی کی تقریب کے دوران ہونے والے خودکش دھماکے کے حملہ آور کی شناخت کر لی گئی ہے۔

کاؤنٹر ٹیررازم ڈپارٹمنٹ (سی ٹی ڈی) نے واقعے کا مقدمہ ڈی آئی خان میں درج کر لیا ہے، جس میں دہشت گردی سمیت دیگر سنگین دفعات شامل کی گئی ہیں۔

ایف آئی آر کے مطابق خودکش دھماکے کے نتیجے میں 7 افراد ہلاک ہوئے، جبکہ تفتیشی ٹیم نے جائے وقوعہ سے ڈی این اے نمونے اور دیگر فارنزک شواہد حاصل کر لیے ہیں۔

پولیس کے مطابق خودکش دھماکے میں ہلاک ہونے والوں میں ایڈووکیٹ عبدالمجید لاگری محسود، وحید جگری، رحمان اللہ، شہزاد عبدلئی، عنایت اللہ اور چھوٹا وحید شامل ہیں، جبکہ ایک اور ہلاک شخص کی شناخت کی تصدیق کا عمل جاری ہے۔

پولیس کا کہنا ہے کہ دھماکے میں وارث خان، نور عالم محسود، توحید اللہ، رحمان خان، سہیل خان برکی اور ندید اللہ زخمی ہوئے، جنہیں فوری طور پر ڈی ایچ کیو اسپتال ڈیرہ اسماعیل خان منتقل کیا گیا، جہاں انہیں طبی امداد فراہم کی جا رہی ہے۔ بعض زخمیوں کی حالت تشویشناک بتائی جاتی ہے۔

مقدمے کے متن میں بتایا گیا ہے کہ یہ دھماکا گزشتہ شب شادی کی تقریب کے دوران مہمانوں کے کمرے میں کیا گیا۔ ایف آئی آر کے مطابق خودکش حملہ آور کی شناخت ہو چکی ہے۔

سی ٹی ڈی کے مطابق خودکش حملہ آور کی شناخت عبدالرحمان کے نام سے ہوئی ہے، جس کی پرورش ایک افغان مہاجر کیمپ میں ہوئی۔ رپورٹ میں بتایا گیا ہے کہ عبدالرحمان نے ابتدائی تعلیم غیر رسمی تعلیمی مراکز اور ایک مدرسے سے حاصل کی۔

سی ٹی ڈی کی ابتدائی تفتیش کے مطابق حملہ آور کم عمری میں انتہاپسندانہ پروپیگنڈے کا شکار ہوا اور اسی سوچ کے تحت اس نے گزشتہ روز امن کمیٹی کے سربراہ نور عالم محسود کے گھر پر خودکش دھماکا کیا۔

واقعے کی مزید تفتیش جاری ہے جبکہ سیکیورٹی ادارے حملے کے نیٹ ورک اور سہولت کاروں کی تلاش میں مصروف ہیں۔