ڈیرہ اسماعیل خان میں دہشت گردوں کی فائرنگ، ایف سی اہلکار ہلاک

ڈی آئی خان (ڈیلی اردو) پاکستان کے شورش زدہ صوبہ خیبر پختونخوا کے ضلع ڈیرہ اسماعیل خان کے علاقے کلاچی موڑ میں دہشت گردوں کی فائرنگ سے ایک ایف سی اہلکار ہلاک ہو گیا۔

پولیس کے مطابق واقعہ اس وقت پیش آیا جب ایف سی اہلکار عید کی چھٹیوں پر اپنے گھر آیا ہوا تھا کہ دہشت گردوں نے فائرنگ کر کے اسے نشانہ بنایا اور موقع سے فرار ہو گئے۔

واقعے کی اطلاع ملتے ہی پولیس اور قانون نافذ کرنے والے اداروں کے اہلکار موقع پر پہنچ گئے، علاقے کو گھیرے میں لے کر شواہد اکٹھے کیے گئے اور حملہ آوروں کی تلاش شروع کر دی گئی۔

پولیس کا کہنا ہے کہ ہلاک ہونے والے اہلکار کی لاش کو ضروری قانونی کارروائی کے بعد ہسپتال منتقل کر دیا گیا ہے جبکہ واقعے کی تحقیقات جاری ہیں۔

حکام کے مطابق حملہ آوروں کی گرفتاری کے لیے سرچ آپریشن شروع کر دیا گیا ہے اور مختلف پہلوؤں سے تفتیش کی جا رہی ہے۔