ڈیرہ اسماعیل خان میں سیکورٹی فورسز کا آپریشن، کیپٹن سمیت 3 اہلکار ہلاک، 10 شدت پسند مارے گئے

اسلام آباد (نمائندہ ڈیلی اردو) صوبہ خیبر پختونخوا کے ضلع ڈیرہ اسماعیل خان کی تحصیل کلاچی کے علاقے کڑی ملنگ میں سیکیورٹی فورسز نے انٹیلیجنس بیسڈ آپریشن (IBO) کرتے ہوئے کالعدم تنظیم تحریک طالبان پاکستان گنڈاپور گروپ کے 10 شدت پسندوں کو ہلاک کر دیا۔

نمائندہ ڈیلی اردو کے مطابق سیکیورٹی فورسز نے خفیہ اطلاعات پر کارروائی کی، جس دوران شدت پسندوں نے مزاحمت کرتے ہوئے فائرنگ شروع کر دی۔ جوابی کارروائی میں تمام دہشت گرد مارے گئے۔ تاہم، آپریشن کے دوران فائرنگ کے تبادلے میں ایس ایس جی کمانڈو پاوندہ بٹالین کے کیپٹن حسنین جٹ سمیت تین اہلکار ہلاک ہو گئے۔

سیکیورٹی ذرائع کے مطابق ہلاک ہونے والے شدت پسند تخریب کاری کی کئی کارروائیوں میں ملوث تھے اور ان کے ٹھکانے سے بھاری مقدار میں اسلحہ و گولہ بارود بھی برآمد ہوا ہے۔ علاقے کو کلیئر کرنے کے لیے سرچ آپریشن جاری ہے۔

حکام کا کہنا ہے کہ دہشت گردوں کے خلاف کارروائیاں جاری رہیں گی اور ملک دشمن عناصر کو کسی صورت برداشت نہیں کیا جائے گا۔