ڈیرہ اسماعیل خان میں پولیس چوکی پر طالبان کا حملہ، دو اہلکار ہلاک، دو زخمی

ڈی آئی خان (نمائندہ ڈیلی اردو) پاکستان کے شورش زدہ صوبے خیبر پختونخوا کے ضلع ڈیرہ اسماعیل خان میں گزشتہ رات یارک کے قریب پولیس چوکی پر کالعدم تنظیم تحریک طالبان پاکستان کے عسکریت پسندوں نے حملہ کر دیا۔

پولیس حکام کے مطابق مسلح افراد نے اچانک چوکی پر فائرنگ شروع کی، جس کے نتیجے میں ایک پولیس اہلکار اور ایک کسٹمز اہلکار ہلاک جبکہ دو پولیس اہلکار زخمی ہو گئے۔ فائرنگ کے تبادلے کے دوران حملہ آوروں نے موقع پر موجود دو سرکاری گاڑیوں کو آگ لگا دی، جو مکمل طور پر تباہ ہو گئیں۔

واقعے کے باعث یارک کے قریب مرکزی شاہراہ پر ٹریفک کی آمدورفت کچھ وقت کے لیے معطل رہی۔ سیکیورٹی فورسز کی اضافی نفری نے علاقے کو گھیرے میں لے کر سرچ آپریشن شروع کر دیا ہے۔

پولیس کا کہنا ہے کہ حملہ آور اندھیرے کا فائدہ اٹھاتے ہوئے فرار ہو گئے، تاہم مختلف مقامات پر ناکہ بندیاں قائم کر کے ان کی تلاش جاری ہے۔ حکام کے مطابق واقعے کی مزید تحقیقات کی جا رہی ہیں۔