ڈیرہ اسماعیل خان میں پولیس چیک پوسٹ پر حملہ ناکام، 2 عسکریت پسند ہلاک، اہلکار زخمی

ڈی آئی خان (نمائندہ ڈیلی اردو) پاکستان کے شورش زدہ صوبے خیبر پختونخوا کے ضلع ڈیرہ اسماعیل خان میں عسکریت پسندوں نے پولیس چیک پوسٹ کھتی پر حملہ کر دیا، تاہم پولیس کی بروقت اور مؤثر جوابی کارروائی کے نتیجے میں دو حملہ آور ہلاک ہو گئے۔

تفصیلات کے مطابق حملہ رات گئے کیا گیا، جس کے بعد پولیس اہلکاروں نے فوری طور پر جوابی کارروائی کرتے ہوئے عسکریت پسندوں کے حملے کو ناکام بنا دیا۔

ڈسٹرکٹ پولیس آفیسر (ڈی پی او) صاحبزادہ سجاد احمد نے بتایا کہ دہشت گردوں کی جانب سے پولیس چیک پوسٹ کھتی کو نشانہ بنایا گیا، تاہم پولیس کی دلیری اور پیشہ ورانہ مہارت کے باعث دو خوارج کو ہلاک کر دیا گیا۔

ڈی پی او کے مطابق حملے کے دوران ایک پولیس اہلکار زخمی ہوا، جسے فوری طور پر طبی امداد کے لیے قریبی اسپتال منتقل کر دیا گیا، جبکہ علاقے میں سرچ آپریشن جاری رکھا گیا۔

حکام کے مطابق اس سے قبل بھی ڈیرہ اسماعیل خان میں کاؤنٹر ٹیررازم ڈیپارٹمنٹ (سی ٹی ڈی) نے انٹیلیجنس بیسڈ کارروائی کے دوران تین مطلوب دہشت گردوں کو ہلاک کیا تھا۔ ہلاک دہشت گردوں کی شناخت نعمت اللہ، عبدالرؤف افغانی اور مصطفیٰ کے ناموں سے ہوئی، جو پولیس اور سکیورٹی فورسز پر حملوں میں براہِ راست ملوث تھے۔

ڈیلی اردو کو سکیورٹی ذرائع نے بتایا ہے کہ حالیہ کارروائیوں میں ہلاک ہونے والے تمام عسکریت پسندوں کا تعلق کالعدم شدت پسند تنظیم تحریک طالبان پاکستان (ٹی ٹی پی) سے تھا۔