ڈیرہ غازی خان میں عسکریت پسندوں نے 9 افراد اغوا کیے، تاوان کے بعد رہائی

واشنگٹن (ش ح ط) پاکستان کے صوبہ پنجاب کے ضلع ڈیرہ غازی خان کی تحصیل تونسہ کے جادیوالی علاقے سے کالعدم تحریک طالبان پاکستان کے مسلح عسکریت پسندوں نے گزشتہ روز 9 افراد کو اغوا کر لیا، تاہم اگلے روز مقامی قبائلی عمائدین کی نگرانی اور مداخلت کے بعد تمام افراد کو تاوان دینے کے بعد آزاد کر دیا گیا۔

معتبر ذرائع کے مطابق اغوا کیے گئے افراد میں چار افراد بستی مڑھا کے رہائشی تھے، جن سے ایک لاکھ روپے وصول کیے گئے اور ان کے دو موٹر سائیکل قبضے میں لیے گئے۔ باقی پانچ افراد دیگر پختون تھے، جن سے 5 لاکھ روپے وصول کیے گئے اور ایک موٹر سائیکل قبضے میں لیا گیا۔ اس کے علاوہ، اغوا کاروں نے لکڑی کاٹنے کا سامان بھی اپنے قبضے میں لے لیا۔

رہائی کے عمل کے بارے میں مقامی ذرائع نے بتایا کہ اغوا شدگان کی رہائی تب ممکن ہوئی جب ان کے اہلخانہ نے اغوا کاروں کو مقررہ تاوان فراہم کیا۔

تونسہ میں واقع جادیوالی علاقہ پنجاب اور خیبر پختونخواہ کی سرحد کے قریب ہے، جو سیکورٹی کے اعتبار سے حساس قرار دیا جاتا ہے۔ 

مقامی ذرائع کے مطابق، قبائلی عمائدین کی بروقت مداخلت اور نگرانی نے اغوا شدگان کی جان بخشی میں اہم کردار ادا کیا۔

واضح رہے کہ چند روز قبل جوتر علاقے میں سی ٹی ڈی (کاؤنٹر ٹیررزم ڈیپارٹمنٹ) اور عسکریت پسندوں کے درمیان فائرنگ کا تبادلہ ہوا تھا، جس میں دو اہلکار زخمی ہوئے۔ اس جوابی کارروائی میں ٹی ٹی پی کا ایک اہم عسکریت پسند زاہد تقبلہ اللہ مارا گیا تھا۔