ڈیرہ غازیخان: جھنگی پولیس چیک پوسٹ پر دہشتگردوں کا حملہ، 7 اہلکار زخمی

لاہور (نمائندہ ڈیلی اردو) صوبہ پنجاب کے سرحدی ضلع ڈیرہ غازی خان کی تحصیل تونسہ شریف کی جھنگی چیک پوسٹ پر 20 دہشت گردوں نے حملہ کر دیا۔ دہشت گردوں کے حملے میں پولیس کے 7 اہلکار زخمی ہوگئے۔

Pakistan: The Jhangi police check-post (Punjab Police) situated at the Punjab-KP border got attacked again. Few cops were injured and the attack was repulsed. https://t.co/kB2sTv0HqA pic.twitter.com/nFgfZapRns

— FJ (@Natsecjeff) May 1, 2024

ترجمان پولیس کے مطابق حملے میں جھنگی چوکی پر تعینات 7 جوان بہادری سے لڑتے ہوئے زخمی ہوگئے۔

ترجمان نے کہا کہ 15 سے 20 دہشت گردوں نے رات کی تاریکی کا فائدہ اٹھا کر مختلف اطراف سے شدید حملہ کیا، دہشت گردوں نے حملے میں راکٹ لانچرز، ہینڈگرینڈ، لیزر لائٹ گنز سمیت جدید اسلحہ استعمال کیا، دہشت گرد جھنگی پولیس چیک پوسٹ پر قبضہ کر کے تعینات اہلکاروں کویر غمال بنانا چاہتے تھے۔

ترجمان پولیس کے مطابق زخمیوں میں اسسٹنٹ سب انسپکٹر عمران، کانسٹیبلز عامر، عاشق زین، رحمت اللہ، ثنااللہ اور ایلیٹ کانسٹیبل طارق شامل ہیں جبکہ شدید زخمی ایلیٹ کانسٹیبل شاہد منظور کو نشتر ہسپتال ملتان منتقل کردیا گیا ہے۔

ترجمان نے بتایا کہ آر پی او ڈی جی خان اور ڈی پی او ڈی جی خان نے 2 روز قبل چوکی کا دورہ کیا، تعینات نفری کو حملے کے ٹھریٹ سے آگاہ اور دفاعی اقدامات کی ریہرسل کروائی تھی۔

آئی جی پنجاب ڈاکٹر عثمان انور نے کہا ہے کہ پنجاب پولیس الرٹ ہے، دہشت گردوں کو کبھی ان کے مذموم عزائم میں کامیاب نہیں ہونے دیں گے، آر پی او ڈیرہ غازی خان اور ڈی پی ڈیرہ غازی خان حملہ کی اطلاع ملتے ہی مزید کمک لے کر موقع پر پہنچے تھے، جھنگی چوکی پر تعینات 7 جوان بہادری سے لڑتے ہوئے زخمی ہوئے، ڈسٹرکٹ پولیس، ایلیٹ ایس او یو کے جوانوں نے بھرپور جواب دیا۔

واضح رہے کہ 14 جنوری کو ضلع تونسہ شریف کی تحصیل وہوا کی جھنگی پولیس چوکی پر دو موٹر سائیکل سواروں کے حملے میں ایک پولیس اہلکار اور ایک شہری ہلاک اور ایک پولیس اہلکار زخمی ہو گئے تھے۔