ڈیرہ مراد جمالی: پولیو ٹیم کی سیکیورٹی پر مامور پولیس اہلکار فائرنگ میں ہلاک

ڈیرہ مراد جمالی (نمائندہ ڈیلی اردو) پاکستان کے شورش زدہ صوبے بلوچستان کے ضلع ڈیرہ مراد جمالی کے علاقے ٹی اینڈ ٹی کالونی میں پولیو ٹیم کی سیکیورٹی پر مامور پولیس اہلکار پر نامعلوم دہشتگردوں نے فائرنگ کر دی، جس کے نتیجے میں ایک اہلکار ہلاک ہو گیا۔

پولیس کے مطابق ہلاک اہلکار کی شناخت فرمان بشیر ولد بشیر احمد، سکنہ ڈیرہ اللہ یار کے نام سے ہوئی ہے۔

پولیس کے مطابق حملہ آور فائرنگ کے بعد موقع سے فرار ہونے میں کامیاب ہو گئے۔

پولیس نے جائے وقوعہ سے شواہد اکٹھے کر لیے ہیں جبکہ ملزمان کی گرفتاری کے لیے علاقے میں سرچ آپریشن جاری ہے۔

حکام کے مطابق واقعے کے محرکات تاحال معلوم نہیں ہو سکے جبکہ حملے کی ذمہ داری بھی کسی نے قبول نہیں کی۔ تحقیقات جاری ہیں۔