ڈیورنڈ لائن پر خونریز جھڑپوں کے بعد پاکستان کا افغانستان میں فضائی حملے

واشنگٹن (ش ح ط) پاکستان کے جنگی طیاروں کی جانب سے افغانستان کے مختلف علاقوں میں مبینہ فضائی حملوں کے بعد خطے میں کشیدگی میں اضافہ ہوگیا ہے، جبکہ پاک افغان سرحد پر بھی جھڑپوں کی اطلاعات سامنے آئی ہیں۔

ذرائع کے مطابق کابل، صوبہ ننگرہار کے صدر مقام جلال آباد اور صوبہ خوست کے مختلف علاقوں میں دھماکوں اور شدید فائرنگ کی آوازیں سنی گئیں۔ بعض مقامات پر وقفے وقفے سے فائرنگ کی اطلاعات بھی موصول ہوئیں۔ 

عینی شاہدین کا کہنا ہے کہ افغان فورسز کو طیارہ شکن ہتھیار استعمال کرتے ہوئے دیکھا گیا، جو مبینہ طور پر پاکستانی طیاروں کو نشانہ بنانے کی کوشش کر رہے تھے۔

دوسری جانب اطلاعات ہیں کہ پاکستان اور افغانستان کے درمیان پاک افغان سرحد پر دو درجن سے زائد مقامات پر جھڑپیں شروع ہوگئی ہیں۔ سرحدی علاقوں میں بھاری اور ہلکے ہتھیاروں کے استعمال کی خبریں ہیں، تاہم جانی یا مالی نقصان سے متعلق کوئی باضابطہ تصدیق سامنے نہیں آئی۔

ادھر وزارتِ دفاع افغانستان نے کابل میں پریس کانفرنس کے دوران بگرام ایئربیس پر حملے کی تصدیق کرتے ہوئے کہا ہے کہ اس کارروائی میں کوئی جانی نقصان نہیں ہوا۔

وزارتِ دفاع کے ترجمان عنایت خوارزمی نے بتایا کہ ایئربیس کو نشانہ بنایا گیا، تاہم کسی کے ہلاک یا زخمی ہونے کی اطلاع نہیں ملی۔

مشترکہ پریس کانفرنس میں افغان حکومت کے نائب ترجمان حمداللہ فطرت نے کہا کہ افغان حکومت کے پاس کابل میں پاکستان کے سفارت خانے کو بند کرنے کا اختیار موجود ہے، لیکن اس حوالے سے تاحال کوئی حتمی فیصلہ نہیں کیا گیا۔

یہ پیش رفت ایسے وقت میں سامنے آئی ہے جب صوبہ قندھار میں ڈیورنڈ لائن کے قریب افغان طالبان کی جانب سے مبینہ طور پر پاکستانی فوجی چوکیوں پر قبضے اور متعدد پاکستانی فوجیوں کے ہلاک یا گرفتار کیے جانے کے دعوے کیے گئے تھے۔۔

تاہم پاکستان کی جانب سے مجموعی صورتحال پر تاحال کوئی تفصیلی باضابطہ بیان جاری نہیں کیا گیا۔

مزید تفصیلات کا انتظار ہے۔