کالعدم تحریک طالبان پاکستان اور حکومت کے مذاکرات جاری

اسلام آباد (ڈیلی اردو) کالعدم تحریک طالبان پاکستان (ٹی ٹی پی) اور حکومت کے درمیان فائر بندی اور مذاکرات جاری ہیں۔

طالبان ذرائع کا بتانا ہے کہ افغان طالبان کے کمانڈر سراج الدین حقانی مذاکرات میں اہم کردار ادا کر رہے ہیں اور ان کی کوشش ہےکہ مذاکرات کامیاب ہو جائیں۔

ذرائع کے مطابق کالعدم تحریک طالبان پاکستان (ٹی ٹی پی) کے سربراہ مفتی نور ولی خود مذاکرات میں شریک ہیں اور مذاکرات کی سربراہی کررہے ہیں۔

طالبان ذرائع کا یہ بھی دعویٰ ہے کہ مضبوط ضمانت اور شرائط تسلیم کرنے کی صورت میں مذاکرات کامیاب ہوسکتے ہیں۔

حکومت نے کالعدم تحریک طالبان پاکستان کو ہتھیار رکھ کر سرینڈر کرنے کا کہا ہے لیکن طالبان کا کہنا ہے کہ ہتھیار رکھ کر آگے بڑھنا قبل از وقت ہے، کالعدم تحریک طالبان پاکستان (ٹی ٹی پی) کے کچھ دھڑے مذاکرات کے حامی ہیں جب کہ کچھ سخت مؤقف اپنائے ہوئے ہیں۔

ذرائع کا کہنا ہےکہ کالعدم تحریک طالبان پاکستان نے حکومت سے اپنے قیدیوں کی رہائی کا مطالبہ کیا ہے۔

یاد رہے کہ ایک ترک نیوز چینل کو گزشتہ ماہ انٹرویو میں وزیراعظم عمران خان نے اس بات کو تسلیم کیا تھا کہ ان کی حکومت ٹی ٹی پی سے مذاکرات کررہی ہے تا کہ وہ ہتھیار ڈال دیں اور معافی کے بدلے صلح کر کے عام شہریوں کی طرح زندگی گزار سکیں۔

تاہم ٹی ٹی پی نے عمران خان کی معافی کی پیشکش کو مسترد کر دیا تھا اور اس بات پر اصرار کیا تھا کہ ان کی جدوجہد پاکستان میں شریعت کے نفاذ کے لیے ہے۔