کراچی سے کالعدم تحریک طالبان پاکستان کے اہم کمانڈرز سمیت 17 دہشت گرد گرفتار

کراچی (ڈیلی اردو) سیکیورٹی فورسز اور انٹیلی جنس ایجنسیز نے صوبہ سندھ کے صوبائی دارالحکومت کراچی میں کالعدم تحریک طالبان پاکستان (ٹی ٹی پی) کا بڑا نیٹ ورک پکڑ لیا۔

ذرائع کے مطابق کالعدم ٹی ٹی پی کے دہشت گرد کراچی میں بڑی کارروائیوں کی منصوبہ بندی کر رہے تھے۔ انٹیلی جنس ایجنسیز نے بروقت کارروائی کرتے ہوئے انہیں کراچی سے گرفتار کرلیا۔ سیکیورٹی فورسز کی اس کارروائی میں اہم کمانڈرز سمیت 17 دہشتگردوں کو گرفتار کیا گیا۔

ذرائع کے مطابق یہ دہشتگرد ٹارگٹ کلنگ اور بھتہ وصولی جیسے سنگین جرائم میں قانون نافذ کرنے والے اداروں کو مطلوب تھے۔

ان کو افغانستان سے ٹی ٹی پی کی قیادت کی سرپرستی میں مدرسہ طلبہ کے روپ میں منظم کیا گیا تھا۔

گرفتار دہشت گرد 2007 تا 2014 تک ٹی ٹی پی نیٹ ورک کا حصہ تھے اور سوات/ملاکنڈ ڈویژن میں سیکورٹی فورسز اور این جی اوز پر مختلف حملوں میں ملوث تھے۔

یہ دہشت گرد کراچی میں فرقہ وارانہ،نسلی،سیاستدانوں کی ٹارگٹ کلنگ اورقانون نافذ کرنے والے اداروں پر حملوں میں بھی ملوث تھے۔

یہ نیٹ ورک افغانستان میں کالعدم ٹی ٹی پی کی اعلیٰ قیادت کے لیے بھتہ خوری کی سرگرمیوں اور اغواء برائے تاوان کے ذریعے فنڈز اکھٹا کرتا تھا۔

اس نیٹ ورک نے مدرسے میں خودکش بمباروں کو بھی پناہ دی تھی جنہیں افغانستان سے کراچی اور ملک کے دیگر حصوں میں مختلف کارروائیوں میں استعمال ہونا تھا۔