کراچی: عسکریت پسندوں کے حملے میں زخمی صحافی امتیاز میر ہسپتال میں دم توڑ گئے

واشنگٹن (ش ح ط) پاکستان کے صوبہ سندھ کے صوبائی دارالحکومت کراچی میں ایک ہفتہ قبل قاتلانہ حملے میں زخمی ہونے والے پاکستانی صحافی اور اینکر پرسن امتیاز میر اسپتال میں زخموں کی تاب نہ لاتے ہوئے ہلاک ہو گئے۔

پولیس کے مطابق، نجی ٹی وی چینل کے سینئر صحافی اور اینکر پرسن، جن پر 21 ستمبر کی رات ملیر کے کالا بورڈ کے قریب ان کی گاڑی پر مسلح حملہ کیا گیا تھا، اتوار کی رات ایک نجی اسپتال میں علاج کے دوران ہلاک ہو گئے۔

حملے کے وقت امتیاز میر اپنے دفتر سے قائدآباد واقع گھر جا رہے تھے۔ ان کی گاڑی ان کے بڑے بھائی محمد صالح چلا رہے تھے جب دو موٹرسائیکلوں پر سوار چھ حملہ آوروں نے قومی شاہراہ پر اندھا دھند فائرنگ کی۔

امتیاز میر کے منہ اور سینے پر کئی گولیاں لگی تھیں اور انہیں لیاقت نیشنل اسپتال منتقل کیا گیا، جبکہ ان کے بھائی معمولی زخمی ہوئے۔

ان کے بھائی ریاض علی، جو کیس کے مدعی ہیں، نے بتایا کہ امتیاز میر علاج کے دوران ہلاک ہو گئے۔

تھانہ سعودآباد کے ایس ایچ او عتیق الرحمٰن نے بھی صحافی کی موت کی تصدیق کی۔

پولیس نے ایک شخص اور اس کے بیٹوں کے خلاف قاتلانہ حملے کا مقدمہ درج کیا ہے اور دعویٰ کیا ہے کہ یہ واقعہ جیکب آباد کی تحصیل ٹھل میں زمین کے تنازع کا شاخسانہ معلوم ہوتا ہے۔

امتیاز میر ایک دہائی سے صحافت کے شعبے سے وابستہ تھے اور سندھی چینل "آواز" اور اردو چینل "میٹرو" پر حالات حاضرہ کے پروگرام کر چکے تھے۔ وہ ان صحافیوں میں شامل تھے جنہوں نے اسرائیل کا دورہ کیا تھا۔

اس حملے کے چند گھنٹوں بعد ایک کم معروف شیعہ عسکریت پسند گروپ "الحسینی ریزسٹنس" کی ذیلی تنظیم لشکرِ ثاراللہ نے اس کارروائی کی ذمہ داری قبول کرنے کا دعویٰ کیا۔

تنظیم نے ایک ویڈیو بھی جاری کی، جس میں دعویٰ کیا گیا کہ امتیاز میر کو ان کے مبینہ طور پر اسرائیل کے حامی مؤقف کی وجہ سے ٹارگٹ کلنگ کا نشانہ بنایا گیا۔

دریں اثنا، وزیراعلیٰ سندھ سید مراد علی شاہ نے امتیاز میر کے ہلاک ہونے پر افسوس کا اظہار کیا اور آئی جی سندھ پولیس کو ہدایت کی کہ قاتلوں کو فوری گرفتار کیا جائے۔

وزیراعلیٰ نے کہا کہ "امتیاز میر کے قاتلوں کو انصاف کے کٹہرے میں لایا جائے گا" اور مرحوم صحافی کی میڈیا میں خدمات کو یاد رکھا جائے گا۔

وزیراعلیٰ کے ترجمان عبدالرشید چنا کے مطابق حکومت اس کیس کو منطقی انجام تک پہنچائے گی۔