کراچی میں رینجرز کی کارروائی، کالعدم ٹی ٹی پی کا مطلوب عسکریت پسند گرفتار

کراچی (نمائندہ ڈیلی اردو) پاکستان رینجرز (سندھ) نے خفیہ اطلاعات کی بنیاد پر کارروائی کرتے ہوئے گلستانِ جوہر سے باجوڑ کے رہائشی کالعدم تحریک طالبان پاکستان کا انتہائی مطلوب عسکریت پسند دوست محمد ولد گل فراز خان کو گرفتار کر لیا۔

تفصیلات کے مطابق گرفتار ملزم نومبر 2020 میں اپنے دیگر ساتھیوں کے ہمراہ اسسٹنٹ کمشنر نواگئی، خیبر پختونخوا پر فائرنگ اور سرکاری مشینری کو نذرِ آتش کرنے میں ملوث رہا ہے۔ اس واقعے کا مقدمہ تھانہ سی ٹی ڈی مالاکنڈ ریجن میں دہشت گردی کی سنگین دفعات کے تحت درج ہے۔

ترجمان رینجرز کے مطابق ملزم واقعے کے بعد کراچی میں روپوش تھا۔ مزید بتایا گیا ہے کہ وہ دیگر ساتھیوں کے ہمراہ شہر کے حساس مقامات پر دہشت گردی کی کارروائیوں کی منصوبہ بندی کر رہا تھا۔