ہونڈراس میں فٹبال شائقین کی ہنگامہ آرائی، 4 افراد ہلاک، 3 پلیئرز سمیت 10 زخمی

ٹیگوسیگالپا (ڈیلی اردو) ہونڈراس میں نیشنل فٹبال چیمپئن شپ میچ کے دوران حریف شائقین کے درمیان ہونے والی ہنگامہ آرائی میں 4 افراد ہلاک اور تین پلیئرز سمیت 10 سے زائد افراد زخمی ہوگئے۔

میڈیارپورٹس کے مطابق مضروب افراد کو مقامی اسپتالوں میں طبی امداد فراہم کی جارہی ہے، میڈیا رپورٹ کے مطابق یہ افسوسناک واقعہ اولمپیا اور موٹگووا کلبز کے حامی شائقین کے درمیان پیش آیا، ہسپتال ترجمان جولیتھ کے مطابق 14 افراد کو داخل کیا گیا تھا۔جس میں 4 کی موت واقع ہوچکی جبکہ 4 افراد کو ایمرجنسی میں طبی امداد فراہم کی جارہی ہے۔

ہنگامہ آرائی کا آغاز موٹگووا کے پلیئرز کو لانے والی بس پر حملے کے بعد شروع ہوا تھا، کلب کے صدر پیڈرو ایٹالا کے مطابق 3 پلیئرز بھی زخمی ہوئے۔

اولمپیا کلب کے چیف رافیل ویلیڈا کا کہنا تھا کہ پرتشدد واقعہ بدقسمتی ہے، اس واقعے کے بعد نیشنل فٹبال لیگ کا میچ معطل کردیا گیا۔