یوکرین کے ایک اور گاؤں نوومیکولائیوکا پر قبضہ کرلیا، روس کا دعویٰ

ماسکو + کییف (ڈیلی اردو/اے ایف پی) روس کی وزارتِ دفاع نے ہفتے کو دعویٰ کیا ہے کہ روسی افواج نے ڈونیٹسک خطے کی سرحد کے قریب

 دنیپروپیترووسک ریجن میں واقع گاؤں نوومیکولائیوکا پر قبضہ کر لیا ہے۔

تاہم یوکرینی فوجی ماہرین کی آن لائن میپنگ سروس کے مطابق یہ گاؤں تاحال کییف کے کنٹرول میں ہے، جب کہ خبر رساں ادارے اے ایف پی کا کہنا ہے کہ روسی دعوے کی آزاد ذرائع سے تصدیق نہیں ہو سکی ہے۔

روسی افواج تعداد اور اسلحے کے اعتبار سے یوکرین پر برتری رکھتی ہیں اور کئی ماہ سے مشرقی محاذ پر پیش قدمی جاری رکھے ہوئے ہیں۔ یوکرین نے اگست کے آخر میں پہلی بار تسلیم کیا تھا کہ روسی فوجی دنیپروپیترووسک ریجن میں داخل ہو چکے ہیں۔ فی الحال روس یوکرین کے تقریباً 20 فیصد حصے پر قابض ہے۔

کریملن کا مطالبہ ہے کہ یوکرین اپنی فوجیں مشرقی دونباس علاقے سے واپس بلائے، تاہم کییف نے اس تجویز کو مسترد کر دیا ہے۔

یوکرینی صدر وولودیمیر زیلینسکی نے جمعے کو کہا کہ ولادیمیر پوٹن کا مقصد ’’پورے یوکرین پر قبضہ‘‘ ہے اور وہ اُس وقت تک نہیں رکیں گے جب تک یہ ہدف حاصل نہ ہو جائے، چاہے یوکرین کچھ علاقہ چھوڑنے پر راضی بھی ہو جائے۔

دوسری جانب کریملن کا کہنا ہے کہ یوکرین کے ساتھ امن مذاکرات فی الحال ’’ٹھہرے ہوئے‘‘ ہیں کیونکہ گزشتہ چند ماہ کے دوران متعدد کوششوں کے باوجود کوئی سفارتی حل سامنے نہیں آ سکا۔