آپریشن سندور پروفیشنل انداز میں کیا گیا اور یہ ’نیشنل وکٹری‘ ہے، بھارتی ائیر چیف

نئی دہلی (ڈیلی اردو) انڈین فضائیہ کے سربراہ اور ایئر چیف مارشل امر پریت سنگھ نے دہلی میں ایک تقریب سے خطاب میں دعویٰ کیا ہے کہ آپریشن سندور(پاکستان اور اس کے زیر اتظام کشمیر میں سات مئی کی شب کیا جانے والا حملہ) انڈیا کی نیشنل وکٹری(قومی فتح) ہے جس پر پوری قوم مبارکباد کی مستحق ہے۔

تقریب سے خطاب کے دوران انڈین ایئر چیف کا کہنا تھا کہ پاکستان کے زیر انتظام کشمیر میں شدت پسندوں کے نو کیمپوں پر حملے نے جدید ٹیکنالوجی کے استعمال کے ساتھ جنگ کی بدلتی ہوئی نوعیت کو ظاہر کیا اور مستقبل کی دفاعی حکمت عملی کے لیے ایک واضح سمت فراہم کی ہے۔یاد رہے کہ پاکستان فوج نے دعویٰ کیا ہے کہ منگل کی رات کو افواج پاکستان نے انڈیا کے پانچ طیارے مار گرائے ہیں۔

یاد رہے کہ چھ مئی کی رات انڈیا کی فوج کے مطابق پاکستان اور پاکستان کے زیرانتظام کشمیر میں نو مقامات کو نشانہ بنایا گیا تھا۔

انڈیا کا دعویٰ ہے کہ اس نے پاکستان اور اس کے زیر انتظام کشمیر میں ’آپریشن سندور‘ کے تحت متعدد مقامات پر ’دہشتگردوں کے ٹھکانوں پر‘ حملے کیے ہیں اور یہ کارروائی پہلگام میں 26 سیاحوں کی ہلاکت کے ذمہ داران کے خلاف تھی۔

انڈین فوج کا دعویٰ ہے کہ یہ مبینہ عسکریت پسند تنظیموں کے مراکز تھے تاہم پاکستانی فوج کے ترجمان نے اس کی تردید کی ہے۔

انڈین فضائیہ کے سربراہ اور ایئر چیف مارشل امر پریت سنگھ نے یہ دعویٰ بھی کیا کہ اس حملے کو بہت پروفیشنل انداز میں کیا گیا ہے۔

امرپریت سنگھ نے کہا کہ اس آپریشن کے دوران ہمیں نہ صرف یہ سمجھنے میں آسانی ہوئی کہ ہم کہاں کھڑے ہوئے ہیں بلکہ یہ بھی سامنے آیا کہ مستقبل میں ہمیں کیا کرنا ہے۔

اپنی تفصیلی تقریر کے دوران انھوں نے انڈیا کے دفاعی منصوبوں میں مسلسل تاخیر پر تشویش کا اظہار کیا اور غیر حقیقی ٹائم لائنز اور آپریشنل تیاریوں پر ان کے اثرات کا بھی ذکر کیا۔

یہ بھی یاد رہے کہ پاکستانی فضائیہ کا دعویٰ ہے کہ اس نے انڈیا کے بیشتر جدید ڈرونز اور براہموس میزائلوں کو ’سافٹ کِل‘ کے ذریعے ناکارہ بنایا اور انھیں اپنے ہدف یعنی پاکستانی افواج کی عسکری تنصیبات بشمول ایئربیسز تک پہنچنے سے روکا۔