امریکی فوج اسرائیل کے ساتھ ایرانی اہداف تباہ کر رہی ہے، صدر ٹرمپ

واشنگٹن (ڈیلی اردو) امریکی صدر ڈونلڈ ٹرمپ نے وائٹ ہاؤس میں انٹر میامی فٹبال ٹیم سے ملاقات کے دوران کہا کہ امریکی فوج اسرائیل کے ساتھ مل کر ایرانی اہداف کو مکمل طور پر تباہ کر رہی ہے اور یہ کارروائیاں شیڈول سے کہیں آگے بڑھ چکی ہیں۔

صدر ٹرمپ نے دعویٰ کیا کہ ایرانی حکومت نے 47 سال کے دوران بےگناہ عوام کو نقصان پہنچایا ہے۔ انہوں نے مزید کہا کہ امریکی اہلکار اس تنازع میں شاندار کام کر رہے ہیں اور ان کے پاس تیل کی قیمتیں کم رکھنے کا منصوبہ بھی موجود ہے۔

ٹرمپ نے ایران کی فضائی اور میزائل صلاحیتوں پر بھی حملوں کا ذکر کرتے ہوئے کہا کہ: “نہ تو ان کے پاس کوئی فضائیہ ہے، نہ فضائی دفاع۔ تمام طیارے اور مواصلاتی نظام ختم ہو چکے ہیں۔”

صدر نے ایرانی حکام کی جانب سے مذاکرات کی پیشکش کے بارے میں کہا: “میں نے ان سے کہا کہ آپ نے دیر کر دی ہے۔ ہم اب لڑنا چاہتے ہیں۔”

خیال رہے کہ ایرانی وزیرِ خارجہ عباس عراقچی نے امریکہ کے ساتھ کسی بھی قسم کے مذاکرات کو مسترد کر دیا ہے، اور کہا کہ گزشتہ مذاکرات کے دوران امریکہ نے حملے کیے۔

صدر ٹرمپ نے یہ بیان انٹر میامی ٹیم کے کھلاڑیوں اور سٹاف کے سامنے دیا، جن میں لیونل میسی سمیت دیگر کھلاڑی بھی موجود تھے۔