ایرانی جنگی جہاز پر امریکی آبدوز کا حملہ، 87 سیلرز ہلاک، 148 لاپتہ

کولمبو (ڈیلی اردو) سری لنکا کے نائب وزیر خارجہ نے بدھ کو مقامی ٹیلی ویژن کو بتایا کہ بحر ہند میں ایک ایرانی جنگی بحری جہاز پر امریکی آبدوز کے حملے میں کم از کم 87 افراد ہلاک ہو گئے۔ جس وقت اس جہاز کو نشانہ بنایا گیا، یہ بین الاقوامی پانیوں میں تھا۔  اس ایرانی بحری جہاز نے بھارت میں ہونے والی بحری مشقوں میں حصہ لیا تھا۔ 

بھارت کی میزبانی میں منعقد ہونے والی کثیر الملکی بحری مشقوں ’’میلان‘‘ کی ویب سائٹ پر درج فہرست کے مطابق ’’آئی آر آئی این ایس دینا‘‘ نامی ایرانی جہاز نے ان بحری مشقوں میں حصہ لیا تھا۔ یہ بھارت کے مشرقی ساحل سے دور خلیج بنگال میں منعقد ہوئی تھیں۔

امریکی وزیر دفاع پیٹ ہیگسیتھ کے مطابق اس جہاز کو ٹارپیڈو سے نشانہ بنایا گیا، جو دوسری عالمی جنگ کے بعد اس نوعیت کا پہلا حملہ ہے۔

قبل ازیں سری لنکا نے کہا تھا کہ کم از کم  32 سیلرز کو زندہ بچا لیا گیا ہے، جبکہ 148 لاپتہ ہیں۔

دوسری جانب ایرانی حکام نے بدھ کو بتایا کہ امریکہ اور اسرائیل کے ساتھ جاری جنگ میں ہلاکتوں کی تعداد کم از کم ایک ہزار پینتالیس تک پہنچ گئی ہے۔ یہ وہ افراد ہیں، جن کی شناخت ہو چکی ہے اور جنہیں تدفین کے لیے تیار کیا جا چکا ہے۔

ایران کی سرکاری خبر رساں ایجنسی ارنا نے بھی بتایا کہ ہفتے سے اب تک امریکی و اسرائیلی حملوں کے نتیجے میں ملک بھر میں ایک ہزار سے زائد افراد ہلاک ہو چکے ہیں، تاہم ان ہلاکتوں کی آزاد ذرائع سے تصدیق ممکن نہیں ہے۔ 

امریکی سینٹرل کمان (سینٹکام) کا کہنا ہے کہ اس نے کارروائی کے دوران 20 سے زائد ایرانی بحری جہازوں کو نشانہ بنا کر سمندر برد کر دیا ہے۔