ایران: مظاہروں میں ہلاک تقریباً 3 ہزار افراد کے نام جاری

تہران (ڈیلی اردو) ایران نے مظاہروں کے دوران ہلاک ہونے والے تقریباً تین ہزار افراد کے نام جاری کر دیے

اتوار کے روز ایران کے صدر مسعود پزشکیان کے دفتر کی جانب سے گزشتہ ماہ ہونے والے مظاہروں کے دوران ہلاک ہونے والے 2,985 افراد کے نام اور شناخت شائع کر دیے گئے۔

مارے جانے والے افراد کے ناموں کی فہرست ملک کے مختلف اخبارات میں شائع کی گئی ہے۔

ایوانِ صدر کے مطابق، جیسا کہ پہلے بتایا جا چکا تھا، حالیہ واقعات میں ہلاک ہونے والوں کی مجموعی تعداد 3,117 ہے، تاہم 131 لاشوں کی تاحال شناخت نہیں ہو سکی، جس کے باعث ان کے نام فہرست میں شامل نہیں کیے جا سکے۔

بی بی سی فارسی کے مطابق، انسانی حقوق کے کارکنوں کا کہنا ہے کہ جاری کی گئی فہرست میں اب بھی بعض نام شامل نہیں۔ ان کا دعویٰ ہے کہ ہلاک ہونے والوں کی اصل تعداد اس سے کہیں زیادہ ہے اور یہ فہرست شائع کر کے ایرانی حکومت ہلاکتوں کی تعداد کم ظاہر کرنے کی کوشش کر رہی ہے۔

ایرانی انسانی حقوق کی تنظیم، جس کا صدر دفتر ناروے کے دارالحکومت اوسلو میں ہے، کے ڈائریکٹر محمود امیری مقدم کا کہنا ہے کہ تہران کی جانب سے تین ہزار سے زائد افراد کے ناموں کی اشاعت درحقیقت ایک بھیانک ریاستی جرم کا اعتراف ہے۔