ایران پر حملے کیلئے کسی بھی جوہری معاہدے کے پابند نہیں، اسرائیلی وزیراعظم

تل ابيب (ڈیلی اردو) اسرائیلی وزیر اعظم نفتالی بینیٹ نے کہا ہے کہ اسرائیل ایران سے ہوئے کسی بھی جوہری معاہدے کا پابند نہیں اور اپنے دشمن کیخلاف کارروائی کرنے کیلئے آزاد ہے۔

رائٹرز کے مطابق پارلیمنٹ کمیٹی میں بریفنگ کے دوران نفتالی بینیٹ کا کہنا تھا کہ ہم ویانا میں ہونے والے جوہری مذاکرات پر سنجیدگی سے نظر رکھے ہوئے ہیں تاہم ہم اس کا حصہ نہیں بنیں گے۔

انہوں نے کہا کہ مذاکرات میں صفحات پر کچھ بھی لکھ دیا جائے اسرائیل کے سامنے اس کی کوئی حیثیت نہیں، وہ جب چاہے جہاں چاہے آزادانہ کارروائی کرے گا۔

واضح رہے کہ 2015 کے بعد سے ایران اور امریکا میں جوہری مذاکرات کا دوبارہ آغاز گزشتہ ہفتے ہی ہوا ہے۔ فرانس کے وزیر خارجہ نے کہا تھا کہ مذاکرات مثبت رُخ پر جارہے ہیں تاہم وقت انتہائی کم ہے۔