ایران کے نائب وزیرِ انٹیلیجنس اور جاسوسی ڈویژن کے سربراہ ہلاک

واشنگٹن (ڈیلی اردو رپورٹ) امریکی و اسرائیلی فضائی حملوں میں ایران کے نائب وزیرِ انٹیلیجنس برائے اسرائیلی امور سید یحییٰ حمیدی ہلاک ہوگئے۔

اطلاعات کے مطابق سید یحییٰ حمیدی ایران کی بیرونِ ملک کارروائیوں اور اسرائیلی و مغربی اہداف سے متعلق آپریشنز میں کلیدی کردار رکھتے تھے۔ 

امریکی حکام ماضی میں ان پر یہودیوں اور مغربی اہداف کے خلاف مبینہ سرگرمیوں اور ایرانی قیادت کے مخالفین کو ٹارگٹ کرنے کے الزامات عائد کرتے رہے ہیں۔ ان کا نام مبینہ طور پر امریکی وفاقی تحقیقاتی ادارے کی مطلوب افراد کی فہرست میں بھی شامل بتایا جاتا رہا ہے۔

اس کارروائی میں وزارتِ انٹیلیجنس کے جاسوسی ڈویژن کے سربراہ جلال پور حسین اور دیگر اہم اہلکار بھی ہلاک ہوئے ہیں۔

اسرائیلی دفاعی افواج (آئی ڈی ایف) نے دعویٰ کیا ہے کہ اس نے سید یحییٰ حمیدی کو ایک فضائی کارروائی میں نشانہ بنایا۔ بیان کے مطابق تہران میں ایران کی وزارتِ انٹیلیجنس کے ہیڈکوارٹر کو بھی نشانہ بنایا گیا۔