بلوچستان: مستونگ میں سی ٹی ڈی کی کارروائی، داعش کے 11 دہشت گرد ہلاک

کوئٹہ (ڈیلی اردو) صوبہ بلوچستان کے ضلع مستونگ میں کاؤنٹر ٹیررازم ڈیپارٹمنٹ (سی ٹی ڈی) کے اہلکاروں سے مقابلے میں 11 مشتبہ دہشت گرد ہلاک ہوگئے۔

ترجمان سی ٹی ڈی کے مطابق بلوچستان میں دہشت گردوں کی موجودگی کی خفیہ اطلاع پر سی ٹی ڈی اور دیگر سیکیورٹی اہلکاروں نے کوئٹہ سے 60 کلومیٹر دور مستونگ کے علاقے قمر مزار عباد میں مشترکہ کارروائی کی۔

سیکیورٹی اہلکاروں نے کمپاؤنڈ کا محاصرہ کرکے مسلح افراد سے ہتھیار ڈالنے کا مطالبہ کیا لیکن انہوں نے فائرنگ شروع کردی، سیکیورٹی اہلکاروں نے پوزیشن سنبھالتے ہوئے جوابی فائرنگ کی۔

ترجمان کا کہنا تھا کہ ‘فائرنگ کے شدید تبادلے کے نتیجے کمپاؤنڈ میں موجود 11 دہشت گرد مارے گئے، دہشت گرد کمپاؤنڈ کو اپنے ٹھکانے کے طور پر استعمال کر رہے تھے’۔

انہوں نے کہا کہ ہلاک ہونے والے دہشت گردوں کا تعلق کالعدم تنظیم دولت اسلامیہ (داعش) پاکستان شاخ سے تھا، جبکہ کمپاؤنڈ سے بڑی تعداد میں اسلحہ اور گولہ بارود برآمد کیا گیا۔

ترجمان کا کہنا تھا کہ مبینہ دہشت گردوں کی شناخت ابھی تک نہیں ہوئی ہے۔