بلوچستان: مغوی اے این پی رہنما ملک عبید اللہ کاسی کو قتل کر دیا گیا

کوئٹہ (ڈیلی اردو) عوامی نیشنل پارٹی کے مرکزی کمیٹی ممبر ملک عبیداللہ کاسی کو بلوچستان میں قتل کر دیا گیا۔

بلوچستان پولیس کے مطابق بلوچستان عوامی نیشنل پارٹی کے مرکزی کمیٹی ممبر ملک عبید اللہ کاسی کو 26 جون 2021 کو نامعلوم مسلح اغواء کاروں نے کچلاک کے نواحی علاقے کلی کیتر گھر کے قریب سے گن پوائنٹ پر اغواء کیا تھا۔

پولیس کے مطابق اغواء کاروں نے تاوان نہ ملنے پر اے این پی کے رہنما و ملک عبیداللہ کو بے دردی سے قتل کردیا جن کی لاش پیشن کے علاقے سرانان سے برآمد ہوئی ہے۔

اغواء کاروں نے ملک عبید اللہ کی رہائی کے بدلے تاوان کا مطالبہ کیا تھا۔

ملک عبید اللہ کی بازیابی کیلئے اے این پی نے صوبہ بھر میں احتجاجی مظاہرے بھی کئے تھے۔