بنوں : پولیس و سی ٹی ڈی کی کاروائی ، مطلوب کمانڈر گیدڑ ہلاک

بنوں(ڈیلی اردو) خیبرپختونخوا کے شورش زدہ ضلع بنوں میں پولیس اور سی ٹی ڈی کے مشترکہ انٹیلیجنس بیسڈ آپریشن کے دوران انتہائی مطلوب دہشتگرد کمانڈر گیدڑ ہلاک ہوگیا۔

ڈی پی او بنوں محمد فرقان بلال نے کارروائی میں مطلوب دہشتگرد کمانڈر کی ہلاکت کی تصدیق کرتے ہوئے بتایا کہ تھانہ ڈومیل کی حدود میں دہشتگرد عناصر کے خلاف آپریشن جاری ہے۔

پولیس کے مطابق کارروائی اکبر علی خان کلے، سداخیل، صدر اوان اور ملحقہ علاقوں میں کی جارہی ہے، جہاں سکیورٹی اہلکار خفیہ اطلاعات کی بنیاد پر دہشتگرد عناصر کی موجودگی اور نقل و حرکت کے خلاف کارروائی کر رہے ہیں۔

علاقے میں سرچنگ اور نگرانی کا سلسلہ بھی جاری ہے جبکہ بنوں ٹاؤن شپ اور ڈومیل کے مختلف علاقوں میں سکیورٹی مزید سخت کردی گئی ہے۔ پولیس کا کہنا ہے کہ آپریشن میں مزید پیش رفت سے متعلق تفصیلات بعد میں جاری کی جائیں گی۔