جنوبی وزیرستان میں پی ٹی آئی کے نومنتخب رکن قومی اسمبلی کے گھر کے باہر دھماکا، 2 افراد ہلاک، متعدد زخمی

وانا (نمائندہ ڈیلی اردو) صوبہ خیبر پختونخوا کے قبائلی ضلع جنوبی وزیرستان میں پاکستان تحریک انصاف کے نومنتخب ایم این اے زبیر وزیر کے گھر کے باہر دھماکا ہوا ہے جس کے نتیجے میں دو افراد ہلاک اور پولیس افسر سمیت متعدد افراد زخمی ہو گئے ہیں۔

تفصیلات کے مطابق جنوبی وزیرستان کے علاقے سری خیل میں این اے 42 سے پاکستان تحریک انصاف کے نومنتخب رکن قومی اسمبلی زبیر وزیر کی تقریبات کے قریب کھڑی گاڑی کے قریب دھماکے میں دو افراد ہلاک جبکہ ایک سب انسپکٹر سمیت متعدد افراد زخمی ہوگئے ہیں. ہلاکتوں کا خدشہ بھی ظاہر کیا جارہا ہے۔

پولیس کے مطابق دھماکے کے بعد پولیس اور سیکورٹی فورسز کی بھاری نفری علاقے کی جانب روانہ ہوگئی۔

رپورٹس کے مطابق زبیر وزیر این اے 42 جنوبی وزیرستان سے عام انتخابات میں آزاد حیثیت سے 20 ہزار 22 ووٹ لے کر کامیابی حاصل کرکے رکن قومی اسمبلی منتخب ہوئے ہیں۔