دہشتگردوں کے تمام نیٹ ورکس کا خاتمہ کریں گے، بیرونی سرپرستی میں ہونے والی دہشتگردی برداشت نہیں کی جائے گی، وزیراعظم شہباز شریف

اسلام آباد (ڈیلی اردو) وزیراعظم شہباز شریف نے بلوچستان کے علاقوں کولپور، کردگاپ اور نوشکی میں سیکیورٹی فورسز کی کامیاب کارروائیوں کو سراہتے ہوئے عزم ظاہر کیا ہے کہ پاکستان میں بیرونی سرپرستی میں ہونے والی دہشتگردی کے مکمل خاتمے تک کارروائیاں پوری قوت سے جاری رہیں گی۔

وزیراعظم نے پاکستان کی مسلح افواج اور سیکیورٹی اداروں کی پیشہ ورانہ صلاحیتوں، بہادری اور بروقت کارروائیوں کو خراج تحسین پیش کرتے ہوئے کہا کہ ملک دشمن عناصر اور ان کے بیرونی سرپرست پاکستان کے امن، قومی سلامتی اور استحکام کو نقصان پہنچانے میں کامیاب نہیں ہوں گے۔

انہوں نے بلوچستان میں کالعدم تنظیم فتنہ الہندوستان کے خلاف انٹیلی جنس بیسڈ آپریشنز کو اہم کامیابی قرار دیا اور کہا کہ پاکستان کی مسلح افواج ہر قسم کے خطرات سے نمٹنے اور دشمن کے عزائم ناکام بنانے کی مکمل صلاحیت رکھتی ہیں۔ دہشتگردوں کے نیٹ ورکس، ان کے معاونین اور سہولت کاروں کے خاتمے کے لیے کارروائیاں جاری رکھی جائیں گی۔

وزیراعظم کا کہنا تھا کہ دشمن عناصر معصوم شہریوں اور سیکیورٹی اہلکاروں کو نشانہ بنا کر خطے کے امن کو نقصان پہنچانے کی کوشش کر رہے ہیں، تاہم پاکستان کی مسلح افواج ان کے تمام مذموم عزائم ناکام بنانے کے لیے پرعزم ہیں۔

واضح رہے کہ پاک فوج کے شعبہ تعلقات عامہ (آئی ایس پی آر) کے مطابق 13 نومبر سے بلوچستان کے علاقوں کولپور، کردگاپ اور نوشکی میں متعدد انٹیلی جنس بیسڈ آپریشنز جاری ہیں، جن کے دوران علاقے میں سرچ آپریشنز اور کوئٹہ تفتان قومی شاہراہ این 40 پر گشت بھی کیا جا رہا ہے تاکہ مقامی شہریوں اور ٹریفک کی حفاظت یقینی بنائی جاسکے۔

آئی ایس پی آر کے مطابق 13 اور 14 نومبر کی درمیانی شب کولپور میں کارروائی کے دوران فتنہ الہندوستان سے تعلق رکھنے والے 8 دہشتگردوں کو ہلاک کیا گیا، جن میں ایک خودکش حملہ آور بھی شامل تھا، جبکہ بڑی تعداد میں اسلحہ اور گولہ بارود برآمد کیا گیا۔

اسی دوران 14 نومبر کو کوئٹہ تفتان شاہراہ پر معمول کی گشت کرنے والی سیکیورٹی فورسز کی گاڑیوں کو مسلح کواڈ کاپٹرز کے ذریعے نشانہ بنایا گیا، جس کے نتیجے میں پاک فوج کے میجر عمر منہاس ناصر اور حوالدار محمد عدنان خان ہلاک ہوگئے۔

دوسری جانب ڈان کی 15 نومبر کی رپورٹ کے مطابق بلوچستان اور خیبرپختونخوا کے ضلع شمالی وزیرستان میں مختلف انٹیلی جنس بیسڈ آپریشنز کے دوران مجموعی طور پر 24 دہشتگرد ہلاک کیے گئے، جبکہ چار سیکیورٹی اہلکار بھی ہلاک ہوئے، جن میں ایک میجر شامل تھا۔

وزیراعظم شہباز شریف نے سیکیورٹی اہلکاروں کی قربانیوں کو خراج تحسین پیش کرتے ہوئے کہا کہ پوری قوم ملک کے دفاع اور امن کے قیام کے لیے مسلح افواج اور سیکیورٹی اداروں کے ساتھ کھڑی ہے۔

انہوں نے اس عزم کا اعادہ کیا کہ پاکستان کی خودمختاری، شہریوں کی جان و مال اور قومی تنصیبات کے تحفظ پر کوئی سمجھوتہ نہیں کیا جائے گا اور ملک میں دہشتگردی کے مکمل خاتمے تک انسداد دہشتگردی کی کارروائیاں جاری رہیں گی۔