رینجرز اور سی ٹی ڈی کی کراچی میں کارروائی، انتہائی مطلوب 2 دہشت گرد گرفتار

اسلام آباد (ش ح ط) صوبہ سندھ کے صوبائی دارالحکومت کراچی میں رینجرز اور سی ٹی ڈی نے مشترکہ کارروائی کرتے ہوئے کالعدم تنظیم کے دو انتہائی مطلوب دہشتگردوں کو گرفتار کرلیا ہے۔

ترجمان رینجرز کے مطابق اورنگی ٹاؤن میں رینجرز نے انٹیلی جنس معلومات کی بنیاد پر کارروائیاں کرتے ہوئے دو دہشت گرد گرفتار کرلیے، ملزمان میں منصور احمد عرف بلال عرف ابراہیم عرف شیخ بھائی اور فضل غنی عرف شفیق عرف نجیب شامل ہیں۔ ملزمان سی ٹی ڈی کی ریڈ بک میں مطلوب تھے۔

ترجمان رینجرز کے مطابق ملزمان کا تعلق کالعدم تنظیم تحریک طالبان پاکستان (ٹی ٹی پی) استاد اسلم گروپ سے ہے، ابتدائی تفتیش میں ملزمان نے کئی وارداتوں کا اعتراف کیا ہے، ملزم عسکری تربیت یافتہ اور متعدد بار افغانستان جاتے رہے ہیں۔

ترجمان نے بتایا کہ ملزم منصور کی گرفتاری پر سندھ حکومت نے 30 لاکھ انعام رکھا تھا، ملزم منصور چمن، بلوچستان اور اسپن بولدک میں روپوش رہا، ملزم جنداللہ گروپ کے کراچی کے امیر ثاقب کا قریبی ساتھی ہے۔

ترجمان رینجرز کا کہنا تھا کہ ملزم فضل غنی کی گرفتاری پر سندھ حکومت نے 20 لاکھ انعام رکھا تھا، ملزمان سے بڑی تعداد میں اسلحہ وگولہ بارود بھی برآمد ہوا ہے۔