شام: دمشق کے نواح میں اسلحہ ڈپو میں زور دار دھماکا

دمشق(ڈیلی اردو) شام کے دارالحکومت دمشق کے نواحی علاقے ضمیر میں اسلحہ ذخیرہ کرنے والے ایک ڈپو میں زور دار دھماکا ہوا، جس کی آواز شہر کے مختلف حصوں میں سنی گئی۔ ابتدائی اطلاعات کے مطابق دھماکا شام کی وزارتِ دفاع سے منسلک اسلحہ گوداموں کے اندر ہوا۔

مقامی ذرائع کے مطابق واقعے کے بعد سول ڈیفنس کی ٹیمیں فوری طور پر جائے وقوعہ پر پہنچ گئیں اور صورتحال کا جائزہ لینے کے ساتھ امدادی کارروائیاں شروع کردیں۔ دھماکے کا مقام الضمیر شہر کے قریب الزہرا اسٹیشن کے بعد بتایا گیا ہے۔

سیکیورٹی ذرائع کا کہنا ہے کہ دھماکا اسلحہ ذخیرہ کرنے کی جگہ کے اندر ہوا، تاہم فوری طور پر یہ واضح نہیں ہوسکا کہ دھماکے کی وجہ کیا تھی اور آیا اس میں کوئی جانی یا مالی نقصان ہوا ہے یا نہیں۔ حکام کی جانب سے واقعے کی مزید تحقیقات جاری ہیں۔

ضمیر دمشق سے تقریباً 45 کلومیٹر شمال مشرق میں واقع ہے۔ یہ واقعہ ایسے وقت میں پیش آیا ہے جب چند روز قبل شمالی ادلب کے علاقے سرمدا کے قریب جنگی باقیات اور اسلحہ جمع کرنے کے ایک عارضی مرکز میں دھماکے کے نتیجے میں 14 افراد ہلاک اور 11 زخمی ہوگئے تھے۔