قطر نے دو ایرانی طیارے گرائے، کویت میں تین امریکی ایف-15 تباہ

واشنگٹن (ڈیلی اردو) قطر کی وزارتِ دفاع کا کہنا ہے کہ اس نے ایران سے آنے والے دو ایس یو-24 لڑاکا طیارے مار گرائے ہیں۔

وزارت کے مطابق ریاست کے مختلف علاقوں کو نشانہ بنانے کے لیے فائر کیے گئے سات بیلسٹک میزائل اور پانچ ڈرون بھی تباہ کر دیے گئے۔ بیان میں کہا گیا کہ تمام میزائل اپنے ہدف تک پہنچنے سے پہلے ہی ناکارہ بنا دیے گئے۔

ایرانی حکام کی جانب سے اس دعوے پر فوری ردعمل سامنے نہیں آیا۔

کویت میں ایف-15 طیارے دوستانہ فائرنگ سے تباہ

امریکی سینٹرل کمانڈ (یو ایس سینٹ کام) نے تصدیق کی ہے کہ تین امریکی F-15E Strike Eagle لڑاکا طیارے کویت میں دوستانہ فائرنگ کے ایک واقعے میں تباہ ہو گئے۔

بیان کے مطابق یہ واقعہ پیر کو آپریشن ایپک فیوری کے دوران پیش آیا، جب ایرانی طیاروں، بیلسٹک میزائلوں اور ڈرون حملوں کے درمیان کویتی فضائی دفاع نے غلطی سے امریکی طیاروں کو نشانہ بنا دیا۔

تمام چھ فضائی اہلکار بروقت ایجیکٹ کرنے میں کامیاب رہے، انہیں بحفاظت ریسکیو کر لیا گیا ہے اور ان کی حالت مستحکم بتائی گئی ہے۔ امریکہ کے مطابق کویت نے اس واقعے کی ذمہ داری تسلیم کی ہے جبکہ امریکی حکام نے کویتی دفاعی فورسز کے تعاون پر شکریہ ادا کیا ہے۔ واقعے کی تحقیقات جاری ہیں۔

ہتھیاروں کے ماہر کرس پارٹرج کے مطابق F-15E ایک ملٹی رول لڑاکا طیارہ ہے جو فضائی اور زمینی دونوں اہداف کو نشانہ بنانے کی صلاحیت رکھتا ہے۔ 

موجودہ تنازع میں یہ طیارے غالباً دفاعی فضائی کارروائیوں میں مصروف ہیں تاکہ ایرانی میزائلوں اور ڈرونز کو روکا جا سکے۔ ان کے پاس ہیٹ سیکنگ اور طویل فاصلے تک مار کرنے والے میزائلوں کے ساتھ گنز اور لیزر گائیڈڈ ہتھیار بھی موجود ہوتے ہیں۔

ان کے بقول جنگی ماحول میں، جہاں فضا میں بیک وقت متعدد میزائل اور طیارے سرگرم ہوں، اس طرح کے واقعات کے امکانات بڑھ جاتے ہیں۔