ٹرمپ کا ایران سے معاہدے کا امکان مسترد، جے ڈی وینس کو مذاکرات کے بجائے ڈیموکریٹ ریاستوں پر توجہ دینے کی ہدایت

واشنگٹن (ڈیلی اردو) امریکی صدر ڈونلڈ ٹرمپ نے کہا ہے کہ امریکہ کو اب ایران کے ساتھ کسی معاہدے کی ضرورت نہیں، کیونکہ ان کے بقول واشنگٹن ایران کے مالی وسائل اور آبنائے ہرمز پر پہلے ہی کنٹرول حاصل کرچکا ہے۔ انہوں نے نائب صدر جے ڈی وینس کو ایران سے متعلق معاملات کے بجائے ڈیموکریٹک پارٹی کے زیرِانتظام ریاستوں اور شہروں میں مبینہ بدعنوانی اور جرائم کے خلاف توجہ مرکوز کرنے کی ہدایت بھی کی ہے۔

ٹرمپ نے جمعرات کو اپنے سوشل میڈیا پلیٹ فارم ٹروتھ سوشل پر جاری بیان میں کہا کہ ایران کے ساتھ معاہدے کی ضرورت کا وقت گزر چکا ہے۔ ان کا دعویٰ تھا کہ امریکہ کے پاس ایران کے سیکڑوں ارب ڈالر اور آبنائے ہرمز بھی ہے۔ تاہم انہوں نے اس دعوے کی مزید تفصیلات یا ایران کے مالی وسائل پر امریکی کنٹرول کی نوعیت واضح نہیں کی۔

امریکی صدر نے جے ڈی وینس کو ہدایت کی کہ وہ مینیسوٹا، کیلیفورنیا اور الینوائے سمیت ڈیموکریٹک قیادت والی ریاستوں میں مبینہ بدعنوانی اور جرائم پر اپنی مکمل توجہ مرکوز کریں۔ ٹرمپ نے الزام عائد کیا کہ ان ریاستوں میں ہر ماہ اربوں ڈالر کی بدعنوانی ہوتی ہے اور اس کے خاتمے سے امریکی بجٹ کو متوازن بنانے میں مدد مل سکتی ہے۔

خبر رساں ادارے ایکسیوس اور واشنگٹن پوسٹ کے مطابق ٹرمپ کا یہ بیان ایران کے ساتھ سفارتی رابطوں میں جے ڈی وینس کے کردار میں ممکنہ تبدیلی کا اشارہ ہے۔ وینس اس سے قبل ایران کے ساتھ جنگ ختم کرنے، آبنائے ہرمز کو بحری آمدورفت کے لیے کھولنے اور جوہری پروگرام سے متعلق معاملات پر مذاکراتی کوششوں میں شامل رہے ہیں۔

اس سے قبل ایسوسی ایٹڈ پریس نے رپورٹ کیا تھا کہ امریکہ اور ایران کے درمیان ثالثوں کے ذریعے ایک مرحلہ وار معاہدے پر بات چیت جاری تھی، جس کے تحت آبنائے ہرمز کو دوبارہ کھولنے، امریکی بحری ناکہ بندی ختم کرنے اور ایران کے منجمد اثاثوں و پابندیوں سے متعلق معاملات طے کرنے کی تجاویز زیرِغور تھیں۔ تاہم ایران کے جوہری پروگرام اور معاہدے پر عمل درآمد کے طریقہ کار سمیت کئی اہم امور پر اختلافات برقرار تھے۔

دوسری جانب رائٹرز کے مطابق آبنائے ہرمز میں کشیدگی اور امریکی و ایرانی پابندیوں نے عالمی توانائی کی منڈیوں کو متاثر کیا ہے۔ یہ گزرگاہ عالمی تیل اور گیس کی ترسیل کے لیے انتہائی اہمیت رکھتی ہے، اس لیے اس کی بندش یا بحری آمدورفت میں رکاوٹ کے اثرات عالمی معیشت اور تیل کی قیمتوں پر مرتب ہوسکتے ہیں۔