کُرم: چنارک پولیس چیک پوسٹ پر حملہ، 4 دہشت گرد اور 2 اہلکار ہلاک

پاراچنار (نمائندہ ڈیلی اردو) پاکستان کے شورش زدہ صوبے خیبر پختونخوا کے قبائلی ضلع کُرم کی تحصیل سینٹرل کرم میں چنارک پولیس چیک پوسٹ پر دہشت گردوں نے حملہ کیا، جس کے نتیجے میں 4 دہشت گرد اور 2 پولیس اہلکار ہلاک ہو گئے۔

ڈی پی او کُرم کے مطابق حملے کے دوران پولیس اور دہشت گردوں کے درمیان شدید فائرنگ کا تبادلہ ہوا، جس میں چار دہشت گرد ہلاک ہوئے۔ پولیس کی جوابی کارروائی میں 6 دہشت گرد زخمی ہوئے۔ واقعے کے بعد علاقے میں سرچ اور کلیئرنس آپریشن شروع کر دیا گیا۔

پولیس حکام کے مطابق بدقسمتی سے فائرنگ کے تبادلے میں کُرم پولیس کے کانسٹیبل واحد اور کانسٹیبل فضل الرحمان ہلاک ہو گئے، جبکہ کانسٹیبل اضغر زخمی ہوئے۔

ذرائع کے مطابق دہشت گردوں نے چنارک تھانے کی چیک پوسٹ کو نذر آتش کردیا ہے ۔

وزیر داخلہ محسن نقوی نے پولیس کی پیشہ ورانہ صلاحیتوں کو سراہتے ہوئے کہا کہ بہادر اہلکاروں نے دہشت گردوں کے خلاف  شجاعت سے لڑتے ہوئے امن قائم رکھا۔ انہوں نے ہلاک والے 2 پولیس اہلکاروں کو خراج عقیدت پیش کیا اور لواحقین سے دلی ہمدردی کا اظہار کیا۔

محسن نقوی نے کہا: ’’ہلاک اہلکاروں کی قربانی کو سلام پیش کرتے ہیں، اور پولیس اہلکاروں کی بہادری پر فخر ہے۔‘‘