یمن کی افواج کا باب المندب اور ذباب ایئرپورٹ سے انخلا، ایران نواز حوثی باغیوں کو اہم بحری گزرگاہ پر برتری حاصل ہونے کا امکان

عدن (ڈیلی اردو) یمن میں سعودی عرب کی حمایت یافتہ حکومتی افواج نے بحیرہ احمر کے داخلی راستے کے قریب واقع تزویراتی اہمیت کے حامل علاقے باب المندب اور ذباب ایئرپورٹ سے اپنی فوجیں واپس بلانے کا اعلان کردیا ہے۔ افواج نے اس اقدام کی وجہ عارضی دارالحکومت عدن اور اس کے نواحی صوبوں کے دفاع کو مضبوط بنانا قرار دیا ہے، تاہم اس پیش رفت کو ایران نواز حوثی باغیوں کے خلاف جاری جنگ میں حکومتی اتحاد کے لیے بڑا دھچکا قرار دیا جا رہا ہے۔

خبر رساں ادارے رائٹرز کے مطابق یمنی حکومت کے لیے لڑنے والی جنوبی مسلح افواج نے اتوار 15 نومبر کو جاری بیان میں کہا کہ مغربی صوبہ تعز میں ذباب ایئرپورٹ اور باب المندب کے علاقے سے فوجیوں کی دوبارہ تعیناتی کا عمل شروع کردیا گیا ہے۔ اس فیصلے کا مقصد عدن اور پڑوسی صوبوں کو درپیش خطرات سے نمٹنا، دفاعی محاذوں کو مضبوط بنانا اور فوجی وسائل کو زیادہ اہم علاقوں میں منتقل کرنا ہے۔

جنوبی افواج کے بیان میں کہا گیا کہ حالیہ فوجی پیش رفت اور عدن سمیت ملحقہ علاقوں کو درپیش خطرات کے پیش نظر موجودہ حالات کے تقاضوں کے مطابق فوجی تعیناتی میں تبدیلی کی جارہی ہے۔ افواج نے حوثی باغیوں کے خلاف کارروائیاں جاری رکھنے اور تعز شہر کا محاصرہ ختم کرانے کے عزم کا بھی اظہار کیا۔

رائٹرز کی رپورٹ کے مطابق یہ انخلا بحیرہ احمر کے ساحلی علاقوں کا کنٹرول دوبارہ حاصل کرنے کے لیے سعودی عرب کی حمایت سے شروع کی گئی تقریباً چھ ہفتوں پر مشتمل جوابی فوجی کارروائی کے اختتام کی علامت ہے۔ ایران نواز حوثی باغیوں نے ستمبر میں تیز رفتار پیش قدمی کرتے ہوئے بحیرہ احمر کے ساحلی علاقوں میں اہم مقامات پر قبضہ کرلیا تھا، جس کے بعد اکتوبر میں حکومتی افواج نے جوابی کارروائی شروع کی تھی۔

اس مہم کے دوران حکومتی فورسز نے آبنائے باب المندب کے قریب ذباب سمیت بعض اہم دفاعی پوزیشنیں دوبارہ حاصل کی تھیں، تاہم وہ ساحلی شہر المخا اور اس کے اطراف سے حوثی باغیوں کو مکمل طور پر پیچھے دھکیلنے میں کامیاب نہیں ہوسکیں۔

رائٹرز کے مطابق حکومتی افواج نے انخلا کے بعد ذباب کے جنوب میں واقع السقیہ کے علاقے کی جانب اپنی پوزیشنیں منتقل کی ہیں، جبکہ فوجی ذرائع کا کہنا ہے کہ قریبی ساحلی علاقوں سے حوثی باغیوں کو پیچھے ہٹانے کی کوششیں بھی جاری ہیں۔

دوسری جانب حوثی باغیوں نے تعز کے اطراف پہاڑی علاقوں میں بھی اپنی پوزیشنیں مضبوط کی ہیں اور اہم زمینی راستوں کو بند کرکے حکومتی افواج پر دباؤ بڑھا دیا ہے۔ تعز شہر کا محاصرہ مزید سخت ہونے سے وہاں انسانی بحران شدت اختیار کرگیا ہے۔ رائٹرز کے مطابق حالیہ لڑائی کے نتیجے میں بے گھر ہونے والے تقریباً 3 لاکھ افراد میں سے نصف کے قریب تعز شہر میں موجود ہیں، جہاں امدادی سامان کی رسائی اور شہریوں کی نقل و حرکت بھی متاثر ہے۔

سعودی عرب اور عالمی بحری تجارت کے لیے خطرات

باب المندب آبنائے عالمی تجارت اور توانائی کی ترسیل کے لیے انتہائی اہم گزرگاہ ہے، جہاں سے بحیرہ احمر کے راستے نہر سویز اور بحیرہ روم تک جہازوں کی آمدورفت ہوتی ہے۔ ایشیا سے یورپ جانے والے تجارتی جہازوں اور تیل بردار ٹینکروں کے لیے یہ راستہ خصوصی اہمیت رکھتا ہے۔

رائٹرز کے مطابق باب المندب کے قریب حوثی باغیوں کا اثر و رسوخ بڑھنے سے عالمی بحری تجارت پر دباؤ میں اضافہ ہوسکتا ہے، خصوصاً ایسے وقت میں جب خلیج اور آبنائے ہرمز کے اطراف بھی جہاز رانی کو سیکیورٹی خطرات کا سامنا ہے۔ اس صورت حال سے خلیجی ممالک کی توانائی مصنوعات کی عالمی منڈیوں تک ترسیل مزید متاثر ہونے کا خدشہ ہے۔

رپورٹ میں بتایا گیا ہے کہ حوثی باغیوں نے حالیہ مہینوں میں سعودی عرب کی بندرگاہوں، ہوائی اڈوں اور سعودی سرکاری تیل کمپنی آرامکو کی تنصیبات کو بھی ڈرون اور میزائل حملوں سے نشانہ بنایا ہے، جس سے پروازوں اور تیل کی ترسیل متاثر ہوئی۔ ان حملوں میں بحیرہ احمر کے ساحل پر واقع سعودی عرب کی اہم تیل برآمدی بندرگاہ ینبع بھی نشانے پر رہی ہے۔

سعودی عرب نے ان حملوں کے جواب میں یمن میں حوثی باغیوں کے ٹھکانوں کو نشانہ بنایا ہے، تاہم باب المندب کے علاقے سے جنوبی افواج کی واپسی کے بعد عدن کی سلامتی اور سعودی عرب کے دفاعی چیلنجز مزید پیچیدہ ہونے کا خدشہ ظاہر کیا جارہا ہے۔

یمنی حکومت کا مؤقف اور جنگ کی صورت حال

عرب نیوز کے مطابق یمن کی جنوبی افواج نے واضح کیا ہے کہ فوجی انخلا کے باوجود تعز شہر کا محاصرہ ختم کرانے اور حوثی باغیوں کے خلاف کارروائیاں جاری رکھی جائیں گی۔ یمنی فوج کے ترجمان ماجد النزیلی نے بھی عدن کے دفاع اور تعز کا محاصرہ ختم کرانے کو قومی ذمہ داری قرار دیا ہے۔

دوسری جانب یمنی صدارتی ادارے کے ایک مشیر نے عرب نیوز سے گفتگو میں اس اقدام کو پسپائی کے بجائے فوجی وسائل کی ازسرنو تقسیم اور دفاعی حکمت عملی قرار دیا۔ ان کے مطابق اس کا مقصد عدن کا دفاع مضبوط بنانا، صوبہ لحج کے محاذوں پر اضافی نفری تعینات کرنا اور تعز کا محاصرہ ختم کرانے کے لیے حالات سازگار بنانا ہے۔

یمن میں خانہ جنگی 2014 میں اس وقت شدت اختیار کرگئی تھی جب حوثی باغیوں نے دارالحکومت صنعاء پر قبضہ کرلیا تھا۔ اس کے بعد 2015 میں سعودی عرب کی قیادت میں قائم اتحاد نے عالمی سطح پر تسلیم شدہ یمنی حکومت کی حمایت میں فوجی مداخلت کی۔ حکومتی افواج نے اسی سال سے جنوبی ساحلی شہر عدن کو اپنا مرکزی ٹھکانہ بنایا ہوا ہے۔

رائٹرز کے مطابق یمن میں 2022 میں اقوام متحدہ کی ثالثی سے ہونے والی جنگ بندی کے بعد نسبتاً سکون رہا، تاہم ایران اور امریکہ و اسرائیل کے درمیان وسیع تر علاقائی جنگ کے پھیلاؤ کے ساتھ رواں سال لڑائی دوبارہ شدت اختیار کرگئی۔

ادھر ایسوسی ایٹڈ پریس کے مطابق بین الاقوامی کمیٹی برائے ریڈ کراس نے 15 نومبر کو تصدیق کی کہ حوثی حکام نے تقریباً 600 قیدی رہا کیے ہیں۔ تاہم یمن کے مختلف محاذوں پر لڑائی اور انسانی بحران بدستور جاری ہے۔

باب المندب سے جنوبی افواج کے انخلا کے اعلان پر سعودی عرب اور حوثی قیادت کی جانب سے فوری طور پر کوئی باضابطہ ردعمل سامنے نہیں آیا تھا۔ اس پیش رفت کے بعد خطے میں بحری تجارت، سعودی عرب کی توانائی برآمدات اور عدن کی سلامتی کے حوالے سے خدشات میں اضافہ ہوگیا ہے۔