افغانستان: کابل میں پاکستانی ناظم الامور پر حملے کا مبینہ ملزم گرفتار

کابل + اسلام آباد (ویب ڈیسک) افغانستان کے درالحکومت کابل میں پاکستانی ناظم الامور عبید الرحمان نظامانی پر حملے کے ملزم کو گرفتار کرلیا گیا۔

سفارتی ذرائع کے مطابق ملزم پاکستانی سفارتخانے کے قریب عمارت کی آٹھویں منزل پر رہائش پذیر تھا اور ملزم نے اپنے فلور کے تین کمروں میں آئی ای ڈیز بچھا رکھی تھیں۔

سفارتی ذرائع کا بتانا ہے کہ افغان سکیورٹی حکام کے پہنچنے پر ملزم نے رسی کی مدد سے چھلانگ لگانے کی کوشش کی تاہم اسے گرفتار کرلیا گیا۔

سفارتی ذرائع کا کہنا ہے کہ ملزم کے قبضے سے اے کے 47 رائفل، لانگ رینج خود کار رائفل، اسنائپر رائفل سمیت دیگر اسلحہ برآمد ہوا ہے۔

سفارتی ذرائع کے مطابق افغان سکیورٹی حکام نے ایک اور مشتبہ شخص کو بھی حراست میں لیا ہے۔

کابل پولیس نے مرکزی ملزم سمیت ایک مشتبہ ملزم کی گرفتاری کا بھی دعویٰ کیا ہے تاہم دنوں کی شناخت اور وابستگی سے متعلق کچھ نہیں بتایا گیا۔

خیال رہے کہ گزشتہ روز افغان دارالحکومت کابل میں پاکستانی ناظم الامور پر قاتلانہ حملہ ہوا جس میں سکیورٹی گارڈ شدہد زخمی ہوگیا۔

سفارتی ذرائع کا کہنا ہے کہ کابل حملے میں زخمی ایس ایس جی کمانڈو کو پشاور پہنچا دیا گیا ہے۔

پاکستان نے افغان ناظم الامور کو طلب کرکے کابل میں ہیڈ آف مشن پر قاتلانہ حملے پر شدید احتجاج کیا اور واقعے کی تحقیقات اور کارروائی کا مطالبہ کیا ہے۔