"اگر حماس نے ہتھیار نہ ڈالے تو قیامت برپا کر دی جائیگی"، اسرائیلی وزیراعظم نیتن یاہو

یروشلم + واشنگٹن (ڈیلی اردو/سی بی ایس)اسرائیلی وزیر اعظم بینجمن نیتن یاہو نے خبردار کیا ہے کہ اگر حماس نے امریکا کی ثالثی میں طے پانے والے امن منصوبے کے تحت ہتھیار نہ ڈالے تو ’’قیامت برپا کر دی جائے گی۔‘‘

اسرائیلی وزیر اعظم بینجمن نیتن یاہو نے امریکی نشریاتی ادارے CBS کو بتایا کہ اگر فلسطینی عسکریت پسند گروپ حماس نے امریکہ کی ثالثی میں طے پانے والے امن منصوبے کے تحت ہتھیار نہ ڈالے، تو ’’قیامت برپا کر دی جائے گی۔‘‘ 

یہ بیان امریکی صدر ڈونلڈ ٹرمپ کی اس دھمکی کی بازگشت ہے، جس میں انہوں نے کہا تھا کہ ضرورت پڑنے پر طاقت کے ذریعے حماس کو غیر مسلح کیا جائے گا۔

صدر ٹرمپ کے پیش کردہ 20 نکاتی امن منصوبے کے تحت حماس کو ہتھیار ڈالنا ہوں گے اور غزہ پٹی کو مکمل طور پر غیر عسکری علاقہ بنایا جائے گا۔

نیتن یاہو نے کہا، ’’ہم نے اتفاق کیا کہ پہلے مرحلے کو مکمل کریں اور اب دوسرے مرحلے کو کامیاب بنائیں۔‘‘ پہلے مرحلے کے تحت اسرائیل اور حماس کے درمیان یرغمالیوں اور قیدیوں کے تبادلے  کی بات کی گئی تھی۔

یہ ابھی واضح نہیں کہ حماس ہتھیار ڈالنے پر آمادہ ہے یا نہیں۔ منگل کے روز حماس نے مبینہ مخبروں کے خلاف کارروائی کرتے ہوئے انہیں سزائے موت دی جبکہ غزہ کے مختلف علاقوں میں حماس کی سکیورٹی فورسز اور مسلح فلسطینی قبائل کے درمیان جھڑپیں بھی ہوئیں۔

غزہ شہر سے اسرائیلی فوج کے انخلا کے بعد حماس کی حکومت کے ماتحت مسلح پولیس نے دوبارہ گشت شروع کر دیا ہے۔ دوسری جانب امریکی صدر ٹرمپ نے منگل کو یقین ظاہر کیا کہ حماس کو کسی بھی طریقے سے غیر مسلح کیا جائے گا۔

جب صدر ٹرمپ سے پوچھا گیا کہ کیا وہ اس بات پر یقین رکھتے ہیں کہ ایسا ہو گا، تو انہوں نے کہا، ’’ہم نے انہیں بتا دیا ہے کہ ہم چاہتے ہیں کہ وہ ہتھیار ڈالیں، اور وہ ہتھیار ڈالیں گے۔ اگر وہ ایسا نہیں کرتے، تو ہم انہیں غیر مسلح کریں گے، یہ جلد اور شاید پرتشدد طریقے سے ہو گا لیکن وہ غیر مسلح ہوں گے۔‘‘