بلوچستان لانگ مارچ: جمہوری وطن پارٹی کے رہنما نوابزادہ گہرام بگٹی گرفتار

کوئٹہ (ڈیلی اردو) جمہوری وطن پارٹی کے رہنما اور بلوچستان کے سابق وزیر نوابزادہ گہرام بگٹی کو تھری ایم پی او کے تحت ڈیرہ بگٹی ٹاون سے گرفتار کر لیا گیا ہے۔

یاد رہے کہ نوابزادہ گہرام بگٹی نے بھی ڈاکٹر ماہ رنگ بلوچ سمیت دیگر خواتین رہنماوں اور کارکنوں کی گرفتاری کے خلاف ڈیرہ بگٹی سے کوئٹہ کی جانب لانگ مارچ کا اعلان کیا تھا اور انھیں آج (چار اپریل) کو نصیر آباد کے علاقے سے کوئٹہ کے لیے لانگ مارچ شروع کرنا تھا۔

تاہم گزشتہ شب نصیر آباد روانگی سے قبل پولیس کی نفری ڈیرہ بگٹی ٹائون پہنچی اور بگٹی ہاوس سے نکلنے کے بعد انھیں گرفتار کرلیا گیا۔

پولیس حکام نے گرفتاری سے قبل انھیں ڈپٹی کمشنر ڈیرہ بگٹی کا وہ حکمنامہ دکھایا جس میں یہ کہا گیا ہے کہ نوابزادہ گہرام بگٹی دفعہ 144کی خلاف ورزی میں لوگوں کو غیر قانونی طور پر اکھٹا کرنے کی سرگرمیوں میں مصروف ہیں۔

تھری ایم پی او کے تحت نوابزادہ گہرام بگٹی کو 30 یوم کے لیے حراست میں رکھنے کا حکم جاری کیا گیا ہے ۔

یاد رہے کہ بلوچستان نیشنل پارٹی کے سربراہ سردار اختر مینگل نے ڈاکٹر ماہ رنگ بلوچ اور بلوچ یکجہتی کمیٹی کی دیگر خواتین رہنماوں اور کارکنوں کی گرفتاری کے خلاف چھ اپریل بروز اتوار کو مستونگ کے علاقے لک پاس سے کوئٹہ کی جانب مارچ کا اعلان کر چکے ہیں۔