غزہ معاہدہ کابینہ کی منظوری کے بعد ہی نافذ ہو گا، اسرائیلی وزیراعظم

یروشلم (ڈیلی اردو ) اسرائیلی وزیر اعظم بینجمن نیتن یاہو کے دفتر نے جمعرات کے روز کہا کہ غزہ پٹی میں یرغمالیوں کی رہائی کے لیے طے پانے والا معاہدہ کابینہ کی منظوری کے بعد ہی نافذ ہو سکے گا۔

عرب میڈیا کی رپورٹوں کے برعکس نیتن یاہو کے دفتر کی طرف سے جاری کردہ ایک بیان میں کہا گیا ہے کہ 72 گھنٹے کی گنتی صرف اسی وقت شروع ہو گی، جب یہ معاہدہ جمعرات کی شام متوقع اسرائیلی کابینہ کے اجلاس میں منظور ہو جائے گا۔

دریں اثناء متحدہ عرب امارات نے بھی جنگ بندی کے فریم ورک کے پہلے مرحلے کے معاہدے کا خیرمقدم کیا ہے اور تمام فریقین سے اس کی شرائط پر عمل کرنے کی اپیل کی ہے۔

سعودی عرب نے کہا ہے کہ وہ امید کرتا ہے کہ یہ معاہدہ دو سال کی تباہ کن جنگ کے بعد امن کی طرف لے جائے گا۔

سعودی عرب کی طرف سے جاری کردہ ایک بیان میں کہا گیا ہے، ’’یہ اہم قدم انسانی مصائب کو کم کرنے کے لیے فوری اقدامات، اسرائیلی انخلا، سلامتی اور استحکام کی بحالی کے ساتھ ساتھ دو ریاستی حل پر مبنی منصفانہ اور جامع امن کے لیے عملی اقدامات کے آغاز کا باعث بنے گا۔‘‘