کراچی میں فائرنگ سے پولیس اہلکار ہلاک

کراچی (ڈیلی اردو) صوبہ سندھ کے صوبائی دارالحکومت کراچی کے علاقے کورنگی میں پولیس اہلکار کو ٹارگٹ کلنگ کا نشانہ بنا دیا گیا۔

ریسکیو ذرائع کے مطابق واقعہ گودام چورنگی پر پیش آیا جہاں نامعلوم افراد کی فائرنگ سے پولیس اہلکار ہلاک ہوگیا۔ پولیس اہلکار مددگار 15میں تعینات تھا۔

ایگزیکٹو ڈائریکٹر جناح ہسپتال سیمی جمالی کا کہنا ہے کہ جناح ہسپتال پہنچنے سے پہلے پولیس اہلکار کی موت ہوچکی تھی، ہلاک اہلکار کی شناخت عارف خان کے نام سے ہوئی ہے۔

ابتدائی معلومات سے ظاہر ہوتا ہے کہ یہ واقعہ ٹارگٹ کلنگ ہے۔

دوسری جانب پولیس اہلکار کے قتل پر آئی جی سندھ مشتاق احمد مہر نے واقعے کا نوٹس لیتے ہوئے رپورٹ طلب کر لی۔

آئی جی سندھ نے ایس ایس پی کورنگی سے پولیس ایکشن سے متعلق تفصیلات فی الفور طلب کر لی ہیں۔