کوہاٹ میں فائرنگ سے دو شیعہ افراد ہلاک

اسلام آباد (ش ح ط) صوبہ خیبر پختونخوا کے ضلع کوہاٹ میں نامعلوم افراد کی فائرنگ سے شیعہ برادری سے تعلق رکھنے والے دو افراد ہلاک ہوگئے ہیں۔

ذرائع نے ڈیلی اردو کو بتایا کہ فائرنگ کا واقعہ کوہاٹ چوک پر پیش آیا۔ جہاں ملزمان نے میڈیکل سٹور کی دکان میں گھس کر فائرنگ کی جس سے دو افراد ہلاک ہوگئے۔

پولیس ذرائع کے مطابق واقعہ کوہاٹ چوک کے قریب بشیر میڈیکوز میں پیش آیا، جہاں نامعلوم دہشت گردوں نے فائرنگ کرتے ہوئے دو افراد کو موت کے گھاٹ اتار دیا اور باآسانی فرار ہوگئے۔ پولیس حکام کے مطابق سید ارتضیٰ اور سید میر حسن جان کا تعلق ضلع ہنگو کے علاقے ابراہیم زئی سے ہے۔

اس واقعے کے بعد کوہاٹ شہر میں شدید خوف و ہراس پھیل گیا اور مرکزی علاقوں میں دکانیں بند ہوگئیں جبکہ علاقے میں پولیس اور قانون نافذ کرنے والے اہلکاروں کی بڑی تعداد پہنچ گئی۔

تاحال کسی تنظیم یا گروپ نے اس حملے کی ذمہ داری قبول نہیں کی ہے۔

جبکہ مظاہرین نے کوہاٹ سڑک کو بلاک کر کے دھرنا دیدیا ہے۔