بلوچستان میں آپریشن شعبان 2، سیکیورٹی فورسز کی کارروائی میں 6 دہشتگرد ہلاک

کوئٹہ(ڈیلی اردو) بلوچستان میں سیکیورٹی فورسز نے آپریشن شعبان 2 کے تحت دہشتگردوں کے خلاف کارروائیاں مزید تیز کر دی ہیں، مختلف کارروائیوں کے دوران 6 دہشتگرد ہلاک جبکہ 9 مشتبہ افراد کو گرفتار کیے جانے کی اطلاع ہے۔

سیکیورٹی ذرائع کے مطابق ساران تنگی کے علاقے میں دہشتگردوں کی موجودگی کی خفیہ اطلاع پر کارروائی کی گئی۔ آپریشن کے دوران سیکیورٹی فورسز اور دہشتگردوں کے درمیان کارروائی ہوئی، جس کے نتیجے میں 6 دہشتگرد ہلاک ہوئے۔

ذرائع کے مطابق کارروائی کے بعد دہشتگردوں کے ٹھکانوں کی تلاشی کے دوران بڑی مقدار میں اسلحہ اور گولہ بارود بھی برآمد کیا گیا، جبکہ 9 مشتبہ افراد کو حراست میں لے کر ان سے مزید تفتیش شروع کر دی گئی ہے۔

سیکیورٹی ذرائع کا کہنا ہے کہ بلوچستان کے مختلف علاقوں میں دہشتگرد عناصر کے خلاف آپریشن شعبان 2 کے تحت کارروائیاں جاری ہیں۔ متعلقہ علاقوں میں سرچ اور کلیئرنس آپریشن بھی کیا جا رہا ہے تاکہ دہشتگردوں کے ممکنہ ٹھکانوں اور نیٹ ورک کا سراغ لگایا جا سکے۔