جی 7 کا ایران سے حوثیوں کی عسکری حمایت اور اسلحہ فراہمی روکنے کا مطالبہ

نیویارک(ڈیلی اردو) جی 7 ممالک کے وزرائے خارجہ نے ایران پر زور دیا ہے کہ وہ یمن کے حوثی باغیوں کی حمایت اور انہیں اسلحے کی فراہمی فوری طور پر بند کرے، جبکہ حوثیوں سے سعودی عرب اور تجارتی جہازوں کے خلاف حملے اور دھمکیاں ختم کرنے کا مطالبہ کیا گیا ہے۔

یہ مطالبات اقوام متحدہ کی جنرل اسمبلی کے اجلاس کے موقع پر نیویارک میں ہونے والے جی 7 وزرائے خارجہ کے غیر رسمی اجلاس کے دوران سامنے آئے۔ گروپ میں امریکہ، برطانیہ، کینیڈا، فرانس، جرمنی، اٹلی اور جاپان شامل ہیں۔

جی 7 وزرائے خارجہ نے یمن سے متعلق صورتحال پر تشویش کا اظہار کرتے ہوئے حوثی باغیوں کی جانب سے سعودی عرب کے خلاف کارروائیوں کی مذمت کی۔ بیان میں حوثیوں سے تمام فوجی سرگرمیاں روکنے اور شہریوں سمیت تجارتی جہاز رانی کو لاحق خطرات ختم کرنے پر زور دیا گیا۔

اجلاس میں کہا گیا کہ خطے میں کشیدگی کم کرنے کے لیے حوثیوں کو سیاسی عمل کی جانب واپس آنا چاہیے۔ جی 7 کے مطابق حوثیوں کی عسکری سرگرمیاں علاقائی سلامتی کے ساتھ ساتھ عالمی تجارت اور اہم سمندری راستوں کے لیے بھی خطرات کا باعث بن رہی ہیں۔

جی 7 وزرائے خارجہ نے ایران سے بھی مطالبہ کیا کہ وہ حوثیوں کی عسکری معاونت اور اسلحے کی فراہمی ختم کرے۔ بیان میں ایران کی جانب سے حوثیوں کی حمایت کو خطے میں کشیدگی سے جوڑا گیا اور اقوام متحدہ کی سلامتی کونسل کی متعلقہ قراردادوں کی پاسداری کی ضرورت پر زور دیا گیا۔

دوسری جانب ایران ماضی میں حوثیوں کو اسلحہ فراہم کرنے کے الزامات کو مسترد کرتا رہا ہے۔ تہران کا مؤقف ہے کہ وہ حوثیوں کی سیاسی حمایت کرتا ہے، جبکہ گروپ کے عسکری معاملات سے متعلق الزامات کی تردید کرتا ہے۔