روس نے جرمن لیوپارڈ ٹینک اور امریکی انفنٹری گاڑیاں گاڑیوں کو قبضے میں لے لیا

ماسکو (ڈیلی اردو/اے ایف پی/رائٹرز) روسی فورسز نے متعدد جرمن ساختہ لیوپارڈ ٹینک اور یو ایس بریڈلی انفنٹری فائٹنگ گاڑیوں کو اپنے قبضے میں لینے کا دعویٰ کیا ہے۔ ماسکو حکومت کی جانب سے اس کارروائی کی ویڈیو بھی ریلیز کی گئی ہے۔

ماسکو کی طرف سے منگل کو جاری ہونے والے ایک بیان میں کہا گیا ہے کہ اس نے کئی جرمن لیوپارڈ ٹینک اور یو ایس بریڈلی انفنٹری فائٹنگ گاڑیوں کو قبضے میں لے لیا ہے۔ ساتھ ہی ایک ویڈیو بھی جاری کی گئی ہے، جس میں روسی فوجیوں کو مغربی ممالک کی جانب سےیوکرین کو فراہم کی جانے والی گاڑیوں کا سروے کرتے دکھایا گیا ہے۔ کچھ عرصہ پہلے ایک طویل بحث کے بعد جرمن حکومت نے مہنگے لیوپارڈ ٹینک یوکرین کو فراہم کرنے کی منظوری دی تھی۔

منگل کو روس کی وزارت دفاع نے ایک بیان میں کہا،”لیوپارڈ ٹینک اور یو ایس بریڈلی انفنٹری فائٹنگ گاڑیاں ہماری ٹرافیاں ہیں۔ ووسٹوک گروپ کے فوجی دشمن کے ٹینکوں اور قبضے میں لی گئیں انفنٹری جنگی گاڑیوں کا معائنہ کر رہے ہیں۔‘‘

اُدھرجنوبی یوکرین کے روس کے زیر کنٹرول علاقے میں تباہ کن سیلاب کے نتیجے میں مرنے والوں کی تعداد بڑھ کر 17 ہو گئی ہے۔ یہ بات ماسکو حکام نے منگل کو بتائی۔

جنوبی یوکرین کے علاقے خیرسون میں روس کی طرف سے تعینات اہلکاروں میں سے ایک آندرے الیکسینکو نے سوشل میڈیا پر اپنی پوسٹ میں لکھا،” آج صبح تک، گولا پریستان میں 12 اور اولیشکی میں پانچ افراد کی ہلاکتوں کی تصدیق ہوئی ہے۔‘‘

دریں اثناء پیر اور منگل کی درمیانی شب مرکزی یوکرینی شہر کرییفی میں شہری عمارتوں پر روس نے میزائل حملے کیے۔ علاقائی حکام کے مطابق ان حملوں کے نیتیجے میں کم از کم چھ افراد ہلاک ہوئے ہیں۔ ریسکیو ورکرز میزائل حملے میں تباہ ہونے والی عمارت کے ملبے تلے دبے شہریوں کی تلاش کی کوششیں جاری رکھے ہوئے ہیں۔

دینیپروپیٹروفسک خطے کے ایک سرکاری اہلکار نے ٹیلیگرام پر ایک پیغام میں لکھا کہ روس کی طرف سے ہونے والے کروز میزائل حملوں میں ایک پانچ منزلہ رہائشی عمارت کو نشانہ بنایا گیا۔ عمارت آگ کی لپیٹ میں آ گئی۔ ابتدائی اطلاعات کے مطابق تین افراد ہلاک ہوئے تھے تاہم کریوی ریح کے میئر اولیکسینڈر ولکول نے سوشل میڈیا ایپ پر لکھا کہ مرنے والوں کی تعداد بڑھ گئی ہے۔ کم از کم چھ اور سات افراد کے ملبے تلے دبے ہونے کا خدشہ ہے۔