روس کے یوکرین پر 50 سے زائد میزائل اور 500 ڈرون حملے، 5 افراد ہلاک، درجنوں زخمی

کییف (ڈیلی اردو/نیوز ایجنسیاں) یوکرینی صدر وولودیمیر زیلنسکی نے اتوار کو کہا کہ روس نے گزشتہ رات یوکرین پر 50 سے زائد میزائل اور تقریباً 500 حملہ آور ڈرون داغے، جن کے نتیجے میں کم از کم پانچ افراد ہلاک اور دس زخمی ہوئے۔

زیلنسکی نے ایکس پر ایک پوسٹ پر لکھا، ’’لیفِو، ایوانو فرینکیوسک، زاپوریژیا، چیرنی ہیو، سُومی، خارکیف، خیرسون، اوڈیسا اور کیرووغراد کے علاقوں کو نشانہ بنایا گیا۔‘‘

ان کے مطابق،’’آج روس نے ایک بار پھر ہماری انفراسٹرکچر تنصیبات کو نشانہ بنایا، وہ سب کچھ جو ہمارے عوام کی معمول کی زندگی کو ممکن بناتا ہے۔ ہمیں زیادہ تحفظ اور دفاعی معاہدوں پر تیز تر عملدرآمد کی ضرورت ہے، خاص طور پر فضائی دفاع کے حوالے سے تاکہ اس فضائی دہشت کو بے معنی بنایا جا سکے۔‘‘

زیلنسکی نے امریکہ اور یورپ سے مطالبہ کیا کہ وہ ’’ایسے اقدامات کریں جو روسی صدر ولادیمیر پوٹن کو روک سکیں۔‘‘

ادھر روسی وزارتِ دفاع نے دعویٰ کیا کہ اس کے حملوں نے صرف ’’یوکرین کی فوجی و صنعتی تنصیبات‘‘ اور گیس و توانائی کے ڈھانچے کو نشانہ بنایا۔

روس نے فروری 2022ء میں یوکرین پر حملے کے آغاز سے اب تک ہمیشہ شہریوں یا شہری تنصیبات کو نشانہ بنانے کی تردید کی ہے۔